柏林爭霸多變蜜蜂針悶仁

猪拉多纳

第71屆德國盃今晚決戰柏林，多蒙特同拜仁踢國家打吡，呢場大戰將有歷史新高嘅182個國家及地區直播，首都柏林奧林匹克球場76,167張門票經已沽清，曾經16度奪標嘅拜仁被視為熱門，不過球隊季尾狀態明顯下滑，加上陣容不整，讓唔起當弗兼陣容復整嘅3屆冠軍「蜜蜂兵團」，黑柴推介多蒙特讓球主勝。

（無綫翡翠台周日凌晨2時直播）

拜仁今季德甲以大超班姿態破紀錄提早7輪封王，聯賽榜總成績拋離次席多蒙特19分，不過球隊喺三月底攞咗冠軍之後狀態明顯走樣，由最初放鬆變咗想谷都谷唔番起，聯賽先後輸畀奧格斯堡同慘敗於多蒙特腳下，歐聯更遭皇馬大炒，新帥哥迪奧拿嘅單調控球戰術開始畀人睇通。球隊近期亦受傷兵問題困擾，哥帥愛將堤亞高艾簡達拿重傷緣盡世盃，副隊長舒韋恩史迪加上仗對史特加受傷需要倦勤，國王列貝利亦受背傷困擾，今仗只能出任後備，中場戰鬥力難免削弱。
多蒙特往績佔上風

多蒙特今季戰績稍遜上季，主要原因係長期受到嚴重傷兵問題打擊，但臨近季尾傷兵問題得以緩和，愈戰愈勇，最近8場賽事於三線作戰取得7勝1和佳績，包括歐聯主場贏皇馬2比0，同作客大炒拜仁3蛋，兩大主力馬高列奧斯同羅拔利雲度夫斯基都處於最佳狀態，後者來季將會轉投拜仁，但已聲明今晚會盡一切努力贏波捧盃獻舊主。

多蒙特近13次對拜仁取得7勝2和4負佳績，教練高普揚言每次對拜仁會以不同戰術帶畀對手麻煩，面對獨沽一味控球嘅哥迪奧拿高下立判。今晚兩軍實力接近，五五波下多蒙特受讓值博。