柏木陽介弗爆帶起紅鑽

猪拉多纳

妹頭最近去咗希臘拍旅遊特輯，唔少當地人以為我哋係日本攝製隊。否認之餘又問吓點解會有咁嘅誤會啦，原來同我哋着得「潮」有關喎！女仔畀人讚梗開心，不過如果講到扮相似日本人呢，可能簡單着件花喱碌「日職」球隊波衫就OK嘞！咁多隊當中，我尤其鍾意大阪櫻花主場件粉紅色衫，真係「潮」得嚟又夠sharp。但係今日櫻花就只可以着住件白色作客波衫，闖入浦和紅鑽個球場囉！

由於要遷就世界盃，日職最近加開快車，基本上一周兩戰，所以好講求球隊嘅體能同心理狀態。主隊紅鑽喺呢排嘅快車期間5戰攞到3勝1和1負，其實表現都唔錯，企穩喺聯賽第二位。紅鑽打從四月到依家主場贏晒，最大功臣梗係柏木陽介啦，全靠佢多次助攻得手。唔知點解，總係覺得柏木陽介熟口熟面嘅？吖！我知喇，佢個樣好似我哋球彩台拍檔阿健呀，哈哈！（其實阿健踢波都唔錯o架！）
櫻花防線曳有科蘭都冇用

至於櫻花，喺亞冠盃畀廣州恒大打到散晒之後，影響到連踢日職都冇晒士氣，上輪主場居然輸咗畀下游嘅仙台維加泰！防線成日失波，有個科蘭在陣都冇用啦。櫻花由四月至今踢咗12場，只得1場冇失波，加埋失咗21球！今場支持紅鑽主勝嘞！

（有線61及201台周六下午1時直播）

踢埋今明兩日，日職就會暫時讓路畀世界盃，而我妹頭亦完成咗今季同東方讀者喺呢度講波經嘅使命。多謝你哋嘅支持，之後我哋喺有線螢幕再見啦！
妹頭推介

浦和紅鑽Vs大阪櫻花

主客和：主勝