巴塞絕殺馬體會

猪拉多纳

西甲終極爭霸為「老大」搏命

「超級決賽日」巴塞捧盃送別「佩老大」！今晚超級星期六好波連場，唔單止有英格蘭足總盃同德國盃兩大決賽上演，西甲煞科周末更戲劇性地上演榜首爭冠大戰，巴塞隆拿喺魯營迎戰馬德里體育會！巴塞只要今晚擊敗馬體會就可以後上封王，撞正隊長佩奧爾過埋今場正式告別魯營，班手足當然想拎番個冠軍送別呢位大佬，一於捧巴塞最後一場絕殺馬體會封王，直取2.95倍「讓主」。

（now632台周日凌晨0:00直播）
碧基 尼馬傷愈 美斯回勇

巴塞早前西甲接連失分，爭標希望幾乎幻滅，但依家只落後馬體會3分，今場只要贏波就可憑較佳對賽成績反壓馬體會奪冠，失而復得嘅機會就在眼前，呢班「地上最強」又點會輕易放過先？最緊要嘅係隊長佩奧爾已正式宣布告別，門將域陀華迪斯亦會今季後離隊，佢兩個今場雖然同樣因傷未能上陣，難免有啲遺憾，但佢班好兄弟必定會搏盡爭番個冠軍返嚟，等佢哋嘅巴塞生涯得以圓滿結束啦！

無可否認，巴塞季尾狀態唔算銳利，好彩尼馬、碧基同佐迪艾巴及時傷愈。美斯近期單天保至尊，4場入3粒，今晚先可以同馬體會爭一日之長短，今場隨時又係佢做救世主o架！加埋另一王牌恩尼斯達一向係「大賽球員」，往往喺危急關頭為球隊出奇制勝，只要佢同美斯發揮出水準，巴塞絕對有望贏波捧盃。
馬體會跌Watt 連續3場失波

馬體會全季表現有幾好，相信球迷都有目共睹，不過唔知「床單兵團」班球員係咪因為大賽經驗唔算多，愈近獎盃壓力愈大，近2場只係逼和馬拉加同輸畀利雲特，白白錯失提早封王嘅機會。上周馬體會鬥馬拉加雖然製造多達15次射門，但最終只憑艾達韋列特嘅入波逼和尾段踢少個嘅對手，顯示把握力跌Watt。而一向穩健嘅防守，最近更連續3場失波，今晚作客魯營，隨時頂唔住輸波而回呀！
乜都玩錦囊：玩埋2.15倍半和

雖然睇好巴塞今晚可以贏波捧盃，不過馬體會近8戰得1次半場落後，就知佢哋係「硬嘢」唔易食，巴塞為咗穩陣求勝，亦未必會貿然進攻，相信要換邊後先會分勝負，2.15倍半場和抵捧o架！
Data King：今季交手 連開5次細

‧兩軍今季5次交手有4次打和，馬體會獲1勝，並全部開出入球細。

‧馬體會近8戰有7次開細。

‧巴塞隆拿近7戰都未能喺半場領先。