荀盤益你：大唐勇將五班惡

不死鸟

平時韋達差唔多已「隻手遮天」，今次停賽期滿復出兼撞啱柏寶、白德民等好手遠征，加埋一大堆騎師正要服刑，睇怕騎足十一場嘅佢又會連場數胡，唔使問騎師王賠率一定熱得交關，不如喺佢坐騎中揀番一兩隻買獨贏好過，其中「大唐勇將」熱極有個譜，值得優先留意。

　　第四場五班泥地一哩，四歲馬「大唐勇將」擺明唔係高班材料，但勝在有一段唔錯嘅追勁，而且質新馬冇乜病痛，喺低班已有優勢。一月中喺湯智傑胯下贏五班千四米開齋，之後七戰四班賽只再添一季，證明評分冇着數，就算負輕磅亦唔多夠跑﹔不過上仗落番五班，就算轉跑從未上名嘅泥地千二，居然亦後追甚勁跑第四，僅輸畀頭馬「實在好」四分三馬位。既然跑嫌短嘅千二米都有走勢，呢場增程兼強配韋達，威力自然更強，伍廐仲差兩W上岸必搏，坐位望贏應唔成問題。

　　德甲水準唔及英超同西甲，但就點都好睇過意甲，兼且今季只餘下兩輪賽事，居然前四名均有機會爭聯賽冠軍，而近期吼住呢幾隊有鬥志嘅波嚟買，亦的確可以搵到食，今晚一於吼實主場出擊嘅哈化柏林。

哈化柏林主場勁

　　依家哈化柏林以六十二分排第三，僅落後禾夫斯堡同拜仁慕尼黑一分，佢除咗要力爭冠軍之外，亦要保住下季出戰歐聯嘅資格，所以餘下對住史浩克04同卡爾斯魯厄嘅賽事，基本上絕對不容有失。呢次主場迎戰史浩克04，由於客隊依家排第八，今季已冇嘢好爭兼最近十場作客賽事只得四勝六負，呢場隨時踢風流波，同主隊可謂形成強烈對比。

　　相反，哈化柏林一眾球員個個弗到漏油，而且今季十六次主場只輸兩次，最犀利係當中僅失十四球，平均每場失唔夠一粒，證明主場威力驚人，既然主隊已集齊贏波條件，推介初盤1.72倍嘅主客和主勝。