河床主場爆基就封王

猪拉多纳

阿甲次循環去到最後一輪賽事，爭標同護級兩邊都非常緊湊，有關方面因此將牽涉爭標嘅3場同護級嘅3場賽事安排喺同時間進行以示公允。河床、學生隊與甘拿斯亞為奪冠而努力；高隆、拉費爾拿與葛度爾古斯就為護級而奮鬥，究竟邊隊可以笑到最後，明早自有分曉。
降班形勢亂 拉費爾拿牙煙

阿甲嘅賽制比較獨特，冠軍分首次循環，兩階段冠軍如果係同一隊就直接贏得總冠軍，如果兩階段冠軍由不同球隊奪得，就要進行一場過嘅總決賽。聖羅倫素係首循環聯賽冠軍，至於次循環聯賽冠軍不離河床、學生隊與甘拿斯亞3隊，當中以河床形勢最好。河床現時領先次席嘅學生隊2分，今仗只要喺主場擊敗基爾梅斯就能穩奪冠軍，球隊喺自己地頭已連贏7場，今仗贏波機會甚高。另一爭標對手學生隊要寄望河床失分至有機會封王，縱然難度甚高亦會全力以赴，對手堤格雷冇嘢好爭戰意成疑，主場難擋近況不錯嘅學生隊。

（周一凌晨4時30分開賽）

至於阿甲降班制度就比較特別，係計算每隊近三季嘅平均分嚟決定邊3隊降班。高隆同拉費爾拿目前嘅平均分係一樣位處降班區域（同獲1.23分），佢哋對上嘅葛度爾古斯只領先兩隊0.009分。假如高隆及拉費爾拿今仗齊齊贏波而葛度爾古斯失分，高隆與拉費爾拿就能成功「甩難」，相反兩隊如果鬥到最後都係同分，就要通過附加賽嚟決定邊隊降班。不過，主場出擊嘅高隆近況麻麻，而且對手奧林普作客向來穩字行先，近七仗六度開出半場和，今仗都係捧「半和」。至於拉費爾拿近況更係頹到爆，球隊近10場都贏唔到，今仗作客面對剛喺自由盃出局谷埋一肚氣嘅沙蘭迪兵工廠相信凶多吉少，平手盤捧主隊。

（周一凌晨2時直播）