失落歐霸士氣重創 賓菲加疲兵獻細

猪拉多纳

「悲情」勁旅賓菲加再上征途，將於今晚葡萄牙盃決賽，喺中立場奧爾拉斯國家運動場出戰里奧艾維。賓菲加上周中歐霸盃決賽同西維爾激戰120分鐘，最終互射12碼落敗，連續兩屆屈居亞軍，球員非常洩氣之餘，亦消耗咗大量體力，今仗隨時回唔切氣。里奧艾維實力低兩班，勢必死守博大霧，相信難以對賓菲加構成威脅。預料疲兵賓菲加小勝居多，主W1.24倍冇肉食，建議揀1.8倍入球細。

（有線155台周一凌晨零時15分直播）

賓菲加今季原想一嘗歐洲賽冠軍滋味，以打破纏繞球隊52年嘅「古特曼魔咒」，可惜功虧一簣，呢場失利對「飛鷹兵團」打擊極大。賓菲加威晒橫行無忌，最希望就係揚威歐洲，依家美夢破碎，對佢哋而言球季甚至可以話係已結束。當然冠軍獎盃冇人會嫌多，但賓菲加對本土「盃仔」葡萄牙盃仲有幾大熱情實令人懷疑。事實上，賓菲加經過一整季4線作戰下，大部分球員已經搏到殘，仲要剛踢完一場令人沮喪嘅惡鬥，難免身心俱疲，隨時力不從心，喺今場出現「創傷後遺症」。
里奧艾維死守博大霧

里奧艾維入波能力弱，聯賽30戰僅入21球，仲少過尾二嘅費利拿。近4仗都食白果，包括剛於一個半星期前葡聯盃決賽淨吞賓菲加兩蛋。

里奧艾維該仗蓄意死守，基本上無反擊之力，弱隊採取「泊大巴」戰術無可厚非，可惜佢哋喺葡聯盃決賽上半場尾段失守，打亂穩守部署，吸取教訓後，佢哋應會再執過條防線，進一步堵塞漏洞。賓菲加有疲態，更加難咬得入里奧艾維，因此入球細係不二之選。
冠軍賠率

賓菲加 1.1倍

里奧艾維 5.8倍