漢堡保甲組席位「格」殺勿論

猪拉多纳

德甲升降班附加賽今晚上演次回合生死戰，漢堡首回合喺主場慘遭乙組球隊格雷特霍夫悶和0:0，為咗避免球會史上首度降班，雲達華治一班人今場肯定毫無保留，以免成為歷史罪人。論實力同經驗，漢堡球員始終較好，嚟到生死關頭點都較有保證，一於撐漢堡可以續留德甲，3.1倍客W值博！

（有線61、64、201及203周日晚11:00直播）
雲達華治唔想做歷史罪人

德甲自從實施升降班附加賽制度後，之前15屆賽事有10屆係由德甲代表贏出，由德乙代表勝出嘅只得5次，可見越級挑戰嘅難度極高。今場漢堡雖然作客，但荷蘭球星雲達華治講明會搏埋條命都唔想做球會歷史罪人，有佢同拉蘇加拍住上，絕對有力幫漢堡贏波。
格雷特霍夫太倚重雙箭頭

格雷特霍夫首回合表現唔差，同漢堡互有攻守都跟得上節奏，不過雙箭頭迪祖迪積同阿斯美被漢堡盯到無晒符，結果兩人都踢唔足全場就被換走，偏偏格雷特霍夫就非常依賴佢哋兩個搵食，如果被盯死就變咗隻無牙老虎，想贏漢堡升班唔係咁易囉。
首回合：格客和0:0

頂占筍盤：漢堡（客勝）