啱啱再做老竇 黎海榮要搵奶粉錢

猪拉多纳

　　華將賴維銘，停完7日賽出番嚟，即刻爆咗隻「陽光王子」，打響聲勢，值得恭喜。而另一位同樣要恭喜嘅，梗係啱啱再做老竇嘅黎海榮，太座幫佢追到個仔，之前佢已經有個囡囡，今次湊成一個「好」字，可喜可賀。

　　黎海榮早前贏隻「贏啲啲」，取得今季第13場勝利，續牌應該唔困難，不過，都唔可以掉以輕心，事關依家馬圈難搵食，1個雷神已經盡收天下兵器，唔好話華將，外籍騎師都冇以前咁吃得開。所以，佢要贏多幾場頭馬，唔係想像中咁易。

　　正所謂，修身齊家治國平天下，黎海榮有仔有女萬事足，應該會落力為事業打拼，而BB仔咁細，奶粉又貴，唔努力搵多啲錢買奶粉點得呀，亦因為人逢喜事精神爽，呢期佢又有好馬在手，係時候爭取勝利。

　　第二場四班1000米，黎海榮騎「海之濤」，呢匹馬轉到李廐後，上次放入第五名，算係跑得幾好，今晚趁地淋，放頭好跑，隨時帶到；第四場四班1200米，「新添」上場99倍剷入第三名，呢匹馬咁新，未知係咩料，但係好開繼續跑同一路程，檔位又好，應有進步演出。