甲府復仇教訓德島「90後」

猪拉多纳

日聯盃不嬲係雞肋，家陣仲要離世界盃決賽周開波只得3周，嗰啲由國腳撐起嘅強隊，實會玩輪換，出人冇保證，今日推介B組場德島漩渦對甲府風林，1.5倍客勝值博。（開場時間：周三晚6:00）
贏活力輸經驗

德島、甲府呢兩支日職下游球隊全無國腳，世盃對佢哋毫無影響，但係日聯盃呢啲食之無味嘅賽事，唔少球隊次次都會縮番條槓，搵啲細路出去練吓腳力。家陣响日職包尾嘅德島，就更加唔使講，佢哋件中堅千代反田充早就傷咗，巴西前鋒戴恩黃斯杜格拉斯呢兩日亦確認要摺埋3個禮拜，呢場波多數會重用木下淑晶、藤原廣太朗、小暮大器、金鐘文、佐佐木一輝、李榮直一群「90後」，咁搞活力就夠呀，但戰鬥力……你哋諗嘞。

冇錯，德島升上日職踢咗14場，所攞到嘅唯一勝仗，就係喺4月29號作客贏甲府1:0，今仗似乎唔係冇得打。但係正因為甲府上場輸得太冇面，令到佢哋作客德島長勝嘅紀錄斷纜，佢哋都會不計代價求贏波，尤其盛田剛平、小野晃樹同基斯坦奴達施華呢排腳風轉順，雖則今場波仲有土屋征夫呢位後防老大哥長抖，都應該復仇在望，客W抵買。