應家柏撐馬體會 歐聯決賽買乜好？

猪拉多纳

馬會行政總裁應家柏係足球狂熱粉絲，佢嘅愛隊拜仁慕尼黑經已喺四強出局，搞到非常無癮，不過CEO仍然期待禮拜六晚，皇馬對馬體會呢場歐冠大戰，其中佢較為睇好馬體會，並分析說：「足球係講求激情嘅一項運動，就算同一隊人腳，領隊能唔能夠帶動球員士氣，效果會有天淵之別，所以我非常欣賞馬德里體育會教練施蒙尼，今季球隊喺佢帶領之下，有脫胎換骨表現，甚至係今季歐洲最出色嘅球隊。而馬德里體育會成功贏得國內聯賽冠軍後，亦大大提升士氣，有望趁住勇勢喺歐冠決賽再下一城，成為雙料冠軍。」
       
應家柏
薛寶力預測和波

奧地利籍騎師薛寶力曾成為多屆德國冠軍騎師，同當地足球圈關係非常密切，好多球星老友，雖然今屆歐冠盃決賽無德國球隊，但以騎者對歐洲足球嘅熟悉，佢嘅分析依然相當具參考價值。薛寶力說：「皇馬同馬體會今屆實力不相伯仲，之前鑑於皇馬傷兵問題，加上中場大將沙比阿朗素冠軍戰停賽，本來較為睇好馬體會，不過馬體會啱啱對巴塞隆拿時元氣大傷，主力射手迪亞高哥斯達相信無法趕得切決賽上陣，因此看來又變回一場勢均力敵賽事，相信賽果只是一球上落，90分鐘和波機會好高。」
       
馬體會教練施蒙尼（Getty Images圖片）
伍碧權：皇馬技高一籌

退休之後轉任評馬人嘅前練馬師伍碧權，唔使再朝朝晨咁早返馬房，今季佢大多數喺屋企睇完波之後，先落馬場睇晨操，歐冠連場大戰佢大部分都冇錯過，所以對皇家馬德里同馬德里體育會兩支球隊嘅波路非常熟悉。
       

權哥分析說：「呢場歐冠決賽會係五五波，90分鐘和波嘅機會唔細，事關皇馬同馬體會兩支球隊今季防守都非常出色，何況係決賽，比賽開頭大家都會踢得守勢啲，唔會輕舉妄動，未打開缺口之前，賽事形勢預料較為膠着，買半場和應該好穩陣。不過，論攻擊力，皇馬始終技高一籌，而且不乏C朗、加里夫巴利呢種可以憑一己之力改變賽果嘅球員在陣，絕對可以睇高一線。」
       
何澤堯無緣欣賞

何澤堯係皇馬球迷，但因為周日要出賽，周六晚需提早休息，未必可以睇到歐聯決賽直播。何澤堯認為愛隊贏波機會較高：「皇馬喺四強輕鬆擊敗上屆冠軍拜仁慕尼黑，有晒冠軍相，雖然有沙比阿朗素停賽唔踢得，但後備力量較強，應該可以放心；而今屆西班牙盃皇馬兩次輕鬆贏馬體會，聯賽輸嗰場只係輸一球，有少少格食格，加上馬體會剛周踢西甲，主力前鋒迪亞高哥斯達受傷提早離場，陣容輸蝕，皇馬絕對可以秤先。」