沙田銀瓶大摩話事

猪拉多纳

　　周日沙田11場草地賽，重頭戲當然係第八場俗稱「跑馬王」的2400米香港冠軍暨遮打盃，亦是今季最後一場一級賽。雖然戲碼強，但競爭性卻相當弱，事關擂台躉「威爾頓」本身實力已突出，加上屬平磅賽，優勢更明顯，相信臨場如無特別意外發生，應是此駒的表演賽，可順利取得季內第五W，而「馬王」寶座亦幾乎肯定是其囊中物。

　　相反，另一場級際賽第十場本地三級賽1200米沙田銀瓶，形勢就緊湊得多，大摩三駒中，近況最佳必然是「一寶」，連續三仗全上名，其中上場同程本地二級賽短途錦標，更是後上輕取剛勇奪國際一級賽KrisFlyer短途錦標的「天久」勝出，賽績出眾，今仗雖然要負133頂磅上陣，但卡士確實較高，坐二望一應該冇問題。至於廐侶「恩格斯」，季內尚未打開勝門，表現難免令人失望，但慶幸本身仍忠心可靠，經常跑得接近，加上馬主蕭氏家族近期當旺頻頻有馬贏，未交代馬隨時先係主力。

　　此外，徐雨石馬房「神舟十號」亦是同場焦點所在，今季才在港初出，評分已由52分大幅上升至現時109分，就算上場初跑級際賽更立即攻陷，質素肯定未見盡，不過，過往六戰全跑直路賽1000米，陣上從未有轉彎經驗，會是較吃虧一點。