馬體會搏到殘皇馬搶W封王

猪拉多纳

今屆萬眾期待嘅歐聯決賽畀馬德里市威晒，皇家馬德里對馬德里體育會嘅巔峰對決，係歐聯史上第一次由同一城市球隊對撼。皇馬有歐聯專家安察洛堤領軍，撞正馬體會有王牌迪亞高哥斯達受傷，今場夾硬踢都未必有料到，梗係撐皇馬開1.82倍W捧盃啦！

（有線61、64、201及203、中央5台周日凌晨2:45直播）
肥安經驗贏晒施蒙尼

皇馬主帥安察洛堤早喺球員年代効力AC米蘭，已攞過2次「歐聯」前身「歐冠盃」。佢退休轉咗做教練後，帶AC米蘭8季，3次打入歐聯決賽，03同07年仲捧埋盃，只有05年不敵利物浦，計埋今屆「肥安」執教生涯已經第4次打入歐聯決賽，經驗唔使懷疑。相比之下，馬體會教頭施蒙尼雖然有莫連奴影子，仲畀人封埋做「新狂人」，但始終係第一次帶隊踢歐聯決賽，點秤都重係差少少。
哥斯達 阿達杜倫有傷

馬體會今季西甲表現突出，但要鬥到最後一場先捧到盃，仲付出沉重代價，射手迪亞高哥斯達喺季尾一直負傷夾硬上陣，結果依家就傷到唔踢得咁滯！日前佢飛去塞爾維亞搵神醫打救，估唔到尋日真係有練番波，不過佢季尾一直都係紮住上，表現大打折扣。另一前線殺手阿達杜倫都受咗傷，馬體會鋒力令人擔心。

其實皇馬本來都有唔少傷兵，不過佢哋去到聯賽煞科日已經畀重心球員抖抖，C朗表明已經冇晒事，今場可以復出，即使中場沙比阿朗素停賽，都有把握擊敗跌Watt嘅馬體會啦！
Data King：馬體會係歐聯「茅躉王」

‧皇馬鋒力堪稱「歐洲之王」，今屆12場歐聯狂轟37球，場均入3.08球。

‧馬體會係今屆歐聯唯一一隊不敗之師，12戰9勝3和，只失6球更加冠絕歐洲。

‧馬體會12場總共有187次犯規，為今季「茅躉王」，共吞27張黃牌，不過未有球員被逐。

‧皇馬今屆歐聯起腳多達187次，命中目標次數有115次，每仗至少有15.9次射門。

‧皇馬王牌C朗轟入16球排射手榜榜首，為歐聯紀錄。

‧皇馬過去30次對馬體會，只得今季聯賽輸過1場。

‧皇馬前鋒賓施馬及中場迪馬利亞為今季歐聯助攻王，各有5次助攻。

‧皇馬12次入歐聯決賽，有9次成功捧走「大耳盃」。

‧皇馬今屆歐聯得到3次12碼機會，但只入1球。
頂占筍盤：皇家馬德里（勝）