打比郡上盤冇「昆」你

猪拉多纳

為17.5億升班Jackpot搏甩髀

搏足成季，食粥食飯就睇今晚！打比郡同昆士柏流浪會師溫布萊球場，合演英冠升班附加賽決賽，爭奪最後一個升上英超嘅席位。「綿羊」踏入季尾贏到開巷，前英格蘭主帥麥卡倫重遊溫布萊傷心地，除咗想省番靚招牌之外，亦要為爭奪1.34億鎊（約17.5億港元）升班Jackpot努力，讓昆士柏平半捧上盤。

（TVB301及廣東體育周六晚10:00直播）
近8戰7勝Fit到漏 QPR主帥認低威

喺邊度跌低就喺邊度企番起身，7年前英格蘭喺歐國盃外圍賽主場2:3不敵克羅地亞，結果無緣亮相08年歐國盃，當時嘅「三獅」主帥麥卡倫被視為國家罪人。不過佢今季終於東山再起，如果成功率領「綿羊」時隔6年重返英超，麥卡倫呢鋪肯定吐氣揚眉。據報道，只要打比郡贏波升班，未來5年夾埋直播同贊助費等至少可以袋1.34億鎊，比起QPR多4,000萬鎊（上季降班，至今仍受惠於「降落傘條款」），加埋會方承諾向球員攤分450萬鎊（約5,900萬港元）升班獎金，球員肯定夠晒鬥心。

打比郡近8仗錄7勝1和佳績，中場新星韋曉士狀態大勇唔在講，今仗就連攻擊中場白賴臣都話可以復出，夥拍首席射手基斯馬田合組三叉戟，絕對有力撕破昆士柏大門。昆士柏喺附加賽4強次回合，要踢到加時先淘汰韋根晉級，陣中球星胡禮菲臘斯、祖爾巴頓同班拿約名氣係大，弊在過晒氣兼走緊下坡，領隊夏利列納賽前更指打比郡更值得升班，未開波就扯白旗，似乎佢都Feel到今仗有暗湧喎！