幸運歡笑跑夠出招

猪拉多纳

　　終於都捱過惡劣天氣，雨過天清，跑馬唔使個心十五十六，顧得場地，又顧唔掂其他嘢，最好仲係今次田草跑A欄，唔會好似其他跑道咁唔公平，對賭仔而言，呢次係難得嘅機會，如果要搏命，真係啱時候，不過，必須量力而為。

　　第四場三班1200米。「幸運歡笑」初出已經賭到5.2倍，當時周街都係「風」，可惜佢只能夠跑到第四，之後跑多3場，成績唔見有好大起色，都係三三四四。我始終覺得呢匹馬未必適合跑谷草，返嚟田草直路長，應該會啱隻馬發揮。

　　另外，記憶之中，大告啲自購馬好少咁快有表現，呢匹馬一定幾好質素，跑到夠返沙田，仲唔係想搏命。

　　威爾頓長途實力雄厚

　　第八場一級賽2400米。「威爾頓」已經贏咗3項一級賽，另有1場跑輸係喺1600米，1800米或以上未逢敵手，長途實力有晒證明。

　　今仗跑大長途，整多四百米佢嘆，得唔得呢？真係冇譜，可能直路衝衝吓乾塘都唔奇，但亦有可能衝得仲加勁，好似裝咗turbo咁，我哋惟有信大摩唔會玩嘢，呢隻馬係主力。

　　第十一場二班1400米。「海鑽石」今季成績一般，1場未贏過，就連位置都冇，大摩唔會咁失威，梗係等啱時候自自然然贏馬交代，呢場再以貝湯美操刀，此駒上次後上跑第五，已經見到有番幾好走勢，話唔定係復甦嘅前奏，若然估得啱，呢場肯定惡到出汁。(陳華棟 資深評馬人)