太極虎起非洲兵底

猪拉多纳

南韓今晚於首爾主場迎戰非洲球隊突尼西亞，今場係太極虎出征世盃前最後一次喺主場獻技，為振奮軍心當然唔想衰畀球迷睇。突尼西亞無緣決賽周抱遊埠心態，加上球隊正處重組期，波童推介讓球主勝。

（周三晚7時開賽）

南韓早於5月初已經落實決賽周23人參賽名單，相信隊形、默契及狀態已不成問題。連同今仗，南韓喺出戰決賽周前安排咗兩場正式熱身賽，對手同樣係來自非洲嘅突尼西亞及加納，擺明針對分組賽對手阿爾及利亞。南韓陣中主力寄誠庸、孫弘民、具滋哲、金甫炅及朴主永等全部都喺歐洲搵食，對另外兩支同組對手比利時、俄羅斯踢法應有一定了解，領隊洪明甫如此安排可謂獨具匠心。而且南韓踢完今仗就會前往美國作最後集訓，然後對完加納便會揮軍巴西，今場喺主場球迷面前當然希望騷一騷哥利喇。
主場炒得起突尼西亞

突尼西亞無緣決賽周，看守領隊荷蘭籍嘅卡諾放棄留任，由比利時教頭歷根斯接手，至今只係踢過一場國際賽咁大把，而且佢哋今次作客只屬拍跳性質，非洲球隊踢熱身賽經常懶懶閒，輸兩、三粒絕對唔出奇。