喀麥隆巴拉圭攜手獻細

猪拉多纳

兩支世盃球隊喀麥隆及洪都拉斯今晚於熱身賽分途出擊。喀麥隆上場贏波但有主力受重創，今於中立場奧地利鬥試陣為主嘅巴拉圭料會避重就輕，首選入球細。另一場來自中北美洲嘅洪都拉斯實力一般，面對近況唔錯、對待熱身賽態度認真嘅土耳其受讓亦冇着數，建議捧客W。

決賽周身處A組嘅喀麥隆現於奧地利集訓，上場熱身賽鬥馬其頓雖以2比0贏波，不過前鋒韋保為咗入波不慎弄傷肩膊，據報傷勢非輕，或無緣出戰決賽周，為免再添傷兵，相信領隊禾卡會叫球員就住嚟踢。巴拉圭冇份出戰決賽周，今次21人名單中只有4名球員代表國家隊上陣次數超過10次，包括隊長辛達告魯斯，其餘均屬欠缺國際賽經驗嘅新丁，料以試陣為先，唔會強攻，因此捧細啱數。

（周五凌晨1時開賽）
洪軍難頂土耳其

另一場洪都拉斯於美國華盛頓鬥歐洲二線球隊土耳其，洪都拉斯決賽周同法國、瑞士兩支歐洲球隊同組，今次正好作為最佳備戰練兵。土耳其雖然無緣世盃，但今次點兵卻強陣出擊，加拉塔沙雷射手布拉卡爾馬斯、多蒙特中場紐尼沙軒同季尾喺漢堡踢到曉飛嘅查漢奴古均有入選，土軍最近兩場熱身賽先後大勝科索沃及擊敗實力不俗嘅愛爾蘭，冇話因為未能出戰決賽周而放軟手腳，計人腳及實力佢哋應該高過洪都拉斯，今場捧客W。

（周五早上8時開賽）