見招拆招:（精叻仔）排內檔再創奇蹟

不死鸟

以往谷草嘅C+3欄賽事向來利一至六檔馬，但今季卻經常見到中外檔馬惡晒，好似上周三之戰，七至十檔全部有馬贏，偏差情況唔係賽前可以估到，可見呢條跑道嘅情況與上季比較已出現變化。

         另外，以往較利外叠衝刺嘅谷草A欄，今季情況亦有變，四月十九日舉行嘅谷草日馬，當日正係用A欄作賽，結果十場賽事之中，有八場由一至五檔馬勝出，可見場地偏差出現大兜亂，既然今次賽事採用A欄作賽，一於吼實內檔馬或放頭馬捧場。

        第五場三班千二米，「奇蹟」曾在此程四捷，雖然係由五班殺上嚟，但上仗亦響三班同程上名，只輸畀「新薪」四分三馬位，已經證明夠班。今仗小休個半月再戰，抽到三檔起步應有力一放到底。

        第七場三班一哩，「有景」今季由七十八分起步，八戰後現評七十分，已有一定反彈空間。近期此駒狀態開始轉勇，今仗回配贏馬拍檔楊啟棠，隨時擦出火花。