|
跑馬有時真係好講運氣，好似日前響新加坡舉行嘅KrisFlyer國際短途錦標咁，姚本輝馬房嘅「蓮華生輝」響柏寶胯下力挫主隊馬「火箭人」奪冠，後駒賽績相當犀利，以往七戰全勝，今仗被「蓮華生輝」打破不敗之身，唔多唔少係因為後駒排到一檔，反而「火箭人」就抽得九檔，一出閘就被迫要搶前。
如果「火箭人」唔係響早段多耗體力，最終「蓮華生輝」係咪可以贏馬﹖真係未知之數。不過，賽馬同其他體育運動一樣，內裏涉及唔少運氣成分，而呢個亦係賽馬吸引人嘅地方。事實上，「蓮華生輝」能夠以一分七秒八嘅破紀錄時間贏馬，已經充分顯示出其實力之強，呢場頭馬可以話極具說服力。
既然柏寶手風咁順，周四夜馬當然要繼續吼實佢啲坐騎。今戰柏寶騎足八場，小妹就留意咗三匹「好」馬，分別係「好兄弟」、「好機緣」同「好德煌」，其中後兩駒均抽得黃金一檔，不妨先作介紹。
頭場五班一哩，「好機緣」季內曾響同程擊敗「威武雄星」贏馬，賽績水準相當高，上仗出爭同程，入直路後移出外欄衝刺得季軍，證明已全面回勇，今次遇上一群弱旅兼抽到一檔起步，係時候重開勝門。
第四場四班千二米，「好德煌」前仗響同程贏馬，彈甩第二名嘅「大勇」兩個幾馬位，證明谷戰威力極強。上場轉跑田草千四米，被捧成兩倍大熱，點知終點前僅輸畀突然神勇嘅「勁惑」，今次回師贏馬路程兼排一檔，當然可以睇高一線喇﹗ | 
金睛卡
发表于 2009-5-19 10:44
变色卡
显身卡
楼主