挪威俄羅斯放悶蛋捧細

猪拉多纳

由金牌教頭卡比路率領嘅「北極熊」俄羅斯，今晚於世盃熱身賽作客「維京海盜」挪威。雖然「維京海盜」今非昔比，但俄軍在卡帥改造下變得穩打穩紮，就算對住弱旅，呢種保守作風應該唔會大變，今仗唔慌多波入，細盤不容錯過。

（TVB 301周六晚10時直播）

自從兩年前大好形勢下喺歐國盃分組賽出局，俄羅斯決心整頓紀律，並重金禮聘意大利名帥卡比路接掌兵符。卡帥於AC米蘭、皇馬、祖雲達斯等獲獎無數，靠嘅係穩健防守，除咗復用身手敏捷嘅門神艾堅菲夫，以洛迪堅、伊拿舒域治、華斯利比里蘇斯基、高巴洛夫所組成嘅防線固若金湯，卡帥亦要求中前場球員積極逼搶，實行全民皆兵，佢不惜棄用攻強守弱嘅「沙皇」艾沙維，呢種意識慢慢植入「北極熊」身上，喺任何環境下都以唔失波為大前提，逐漸築起一道銅牆鐵壁，想入佢哋波唔係咁易。
卡比路風格穩字行先

挪威唔單止冇份踢今屆世盃，近年人才凋零搞到戰績每況愈下，周中更狂吞法國4蛋，演出慘不忍睹，淨計主場近9仗僅得1勝，連對住冰島、蘇格蘭之流都贏唔到，真係曳到冇朋友。不過，俄羅斯上仗熱身賽靠後備入替嘅老牌射手基沙哥夫建奇功，先至以1比0險勝斯洛伐克，之前面對阿美尼亞、阿塞拜疆、北愛、冰島等弱旅亦冇乜交收，贏都係一球起兩球止，完全反映出卡比路穩字行先嘅實用主義，就算作客冇還手之力嘅「維京海盜」，極有機會再放悶蛋，轉玩入球細更佳。