多倫多失兩主力難爆機

猪拉多纳

巴西世盃仲有12日就開鑼，不過有啲國家仲有聯賽踢緊，例如瑞典超、巴甲同埋美職，新一季美職唔經唔覺已經踢咗十幾場，當中喺季前大肆擴軍嘅FC多倫多，到依家都未擺脫魚腩本色，喺東西岸總排名暫排第14，今場即使喺主場對住哥倫布機員都冇甜頭可言，讓唔起機員，阿King今場一於捧讓球客勝。

（TVB 301周日清晨5時直播）
機員叉足電頂得住

FC多倫多喺季前動作多多，買嚟迪科爾、米高巴特利同施薩索拉斯三線星級戰將，以為喺季初四戰取得三勝一負嘅成績，多倫多終於可以搣甩魚腩之名，點知原來係曇花一現，跟住錄得三連敗，表現飄忽。

FC多倫多三日前先喺主場同蒙特利爾衝擊打和1比1，今場對住養尊處優嘅哥倫布機員體力一定蝕底，況且今場仲要冇埋米高巴特利同施薩索拉斯，二人分別被徵召入美國同巴西國家隊備戰世盃，戰鬥力大副削弱，實在讓唔起近期重上正軌嘅哥倫布機員。機員雖然都有後防韋朗法蘭西斯同基安卡路干沙利斯為哥斯達黎加備戰世盃，不過影響冇FC多倫多咁大，中場艾芬芬尼更係大勇，今場受讓值捧。

另外，巴甲大戰，聖保羅主場對明尼路，明尼路狀態大勇，連番奏捷，今場對住近期表現未算突出嘅聖保羅受讓值捧。至於維多利亞將喺中立場對戰利斯菲體育會，維多利亞有望擊敗作客表現打折嘅利斯菲體育會。