意大利捉愛爾蘭祭旗

猪拉多纳

90後鋒線擔正搏殺

「藍衫軍」省爆愛爾蘭壯行色！意大利今晚喺富咸嘅卡雲農舍球場同愛爾蘭「拍跳」，上演世盃開波前嘅首場熱身賽，雖然「藍衫軍」唔算世盃大熱門，但陣中球星比比皆是，除咗派路掌控中場，仲有巴洛迪利拍住恩斯治尼及恩莫比尼兩大超新星攻堅，呢3位「90後」攻擊手聯手，絕對可以炒起愛爾蘭，撐2.33倍「讓主」！

（TVB301周日凌晨2:45直播）

意大利喺上屆歐國盃決賽慘負西班牙、近5場國際賽仲全部贏唔到添，不過對住愛爾蘭又唔同講法喎，皆因「藍衫軍」自1926年以嚟12次對賽贏足8場，加上愛爾蘭近8戰只係贏過拉脫維亞、哈薩克等弱旅，實力勁削，可以話係世盃前夕拎嚟提升信心嘅最好對手！
羅斯佬傷愈搏命操

事實上，「藍衫軍」鋒力的確靠得住，佢哋條90後鋒線除咗有巴洛迪利孭飛，仲有兩大超新星恩斯治尼同恩莫比尼做拍檔添，先講恩斯治尼先吖，呢位小將去季喺拿玻里大放光芒，速度同射術兼備，早就被視為國家隊明日之星，如今正式上位，可以話係意料之內。

另外嗰件恩莫比尼就仲堅，佢去季為拖連奴上陣33次勁入22球，成為應季意甲神射手，家陣連多蒙特都鎖定佢做羅拔利雲度夫斯基嘅接班人，就知佢有幾猛料啦！

除咗90後鋒線，意大利仲有件前鋒基奧斯比羅斯候命，雖然「羅斯佬」長期受傷患困擾，但據聞啱啱傷愈嘅佢，近排搏晒命咁操，希望趕得切喺呢場賽事復出，就連柏帥都深受感動，各位球迷今晚有望見到「羅斯佬」披甲o架！
愛爾蘭仲靠羅比堅尼

對家愛爾蘭陣中的確有唔少球員薄有名氣，但最大問題係佢哋前線兩位主將羅比堅尼及奇雲杜里年事已高，同意大利嘅「90後鋒線」相比，活力同技術都差一大截，今晚隨時連蛋都破唔到！
Data King：藍衫軍旺開半大

‧意大利近6戰有4次攻入2球，當中4次開半場大。

‧愛爾蘭近5戰有4次開入球大。
乜都玩錦囊：攻強守弱玩大啱晒

意大利有幾位射術高超嘅後生仔壓陣，火力唔嘢小，但問題係依家嘅「藍衫軍」防線同舊時爭好遠，今場省對手幾粒之餘，後邊隨時都會失波，2.02倍入球大抵玩。