德國試兵唔喀氣

猪拉多纳

非洲雄獅扭獎金Hea踢

世盃就快到嚟，奪標熱門德國今晚世盃熱身賽會坐鎮主場嘅保路西亞公園球場，迎戰另一支世盃分子「非洲雄獅」喀麥隆。德國雖有主力紐亞、拿姆及舒韋恩史迪加肯定倦勤，但正好畀機會艾歷杜姆、禾蘭等新人博上位嘅機會，加上喀麥隆又傳出因獎金問題疑罷踢世盃，德國可大勝士氣低落嘅「非洲雄獅」，不妨直取讓球主勝。

（now 632周一凌晨2時30分直播）

經過24年嘅等待，德國對今屆世盃志在必得，點知撞正傷兵接踵而至，先有隊長拿姆同門將紐亞齊齊喺德國盃受傷，同有養傷在身嘅「小豬」舒韋恩史迪加今仗對喀麥隆缺陣，防中拿斯賓達亦拉傷大腿，被迫退隊兼緣盡世盃，惟有召入小將基拉馬頂檔。幸好德國人才輩出，好似多蒙特90後左閘艾歷杜姆，季中頂替受傷嘅舒姆沙表現突出，由於隊長拿姆講到明唔想再踢左閘，舒姆沙一向在國家隊發揮欠佳，畀到機會艾歷杜姆攝位。
箭頭禾蘭要證明自己

睇番德國26人大軍，只有老將高路斯及禾蘭兩位正宗前鋒，主帥勒夫又傾向踢無鋒陣，賀芬咸新星禾蘭必須喺對喀麥隆證明自己，雖然今仗高路斯會擔正，但相信禾蘭會有機會後備入替。咁啱「非洲雄獅」發生內訌，乜嘢原因？咪又係錢作怪囉！上周中熱身賽1比2輸畀巴拉圭後，即傳出喀麥隆足總只為每位世盃國腳準備3.7萬歐元（約39萬港元）獎金，眾將覺得出手太奀，大佬伊度奧即帶頭威脅足總，假如唔提高獎金，唔排除Hea操甚至罷踢世盃，臨出征巴西前搞單咁杰嘅嘢，嚴重影響士氣。非洲球員不嬲認錢唔認人，冇乜國家榮辱感，若果呢單嘢拆唔掂，今仗作客德國Hea踢唔奇，艾歷杜姆、禾蘭等新仔仲唔趁機搏甩髀咩，讓球主勝咪錯過。