伐木者跌Watt讓唔起白帽

猪拉多纳

今日阿king繼續講美職，聽朝9點波特蘭伐木者喺主場迎戰溫哥華白帽，上季西岸冠軍波特蘭伐木者今季狀態回落，嚟到近期先取得聯賽首次2連勝，反觀溫哥華白帽開季至今表現平穩，近5場更保持不敗，受讓值捧。

（TVB 301周一早上9時直播）

波特蘭伐木者上季憑住超強防守勇奪西岸冠軍，整季踢咗34場賽事僅失33球，但今季佢哋刻意要加強進攻，反而搞到唔湯唔水，至今踢咗13場波已經失咗成20球咁多，仲要踢到開咧差唔多兩個月先至取得首勝，認真失威。雖然伐木者近兩場全勝，不過要留意嘅係兩場都係作客，主場戰績反而仲曳，近7次主場僅錄1勝，而且球員踢完上一場只有3日時間休息，體力肯定比白帽輸蝕。

相反，溫哥華白帽今季表現大躍進，至今只係輸咗兩場，上場對西岸「1哥」西雅圖海灣者爭啲贏埋，可惜臨完場輸球12碼，未能直取3連勝，以伐木者今季嘅表現，實在讓唔起佢哋。白帽防守雖然唔強，但勝在有攻力，所以今場除咗捧讓球客勝外，大盤亦唔怕追。
捧埋銀河大急流W

最後講埋另外兩場美職，首先係芝加哥火燄主場對洛杉磯銀河，銀河一對前鋒當路雲同羅比堅尼狀態托弗，面對防守脆弱嘅火燄大盤捧得過。至於作客例牌腳軟嘅侯斯頓戴拿模要造訪科羅拉多急流，急流上場取得大勝，士氣大振，主勝唔怕追。