瑞士射手爭上位博「讓主」

猪拉多纳

自從射手阿歷山大費爾掛靴後，瑞士正選前鋒位冇人坐得穩，主帥希斯菲特希望透過世盃前嘅熱身賽，考察邊位球員可以喺今屆世盃孭飛。佢哋今晚主場對住踢風流波嘅秘魯，一眾鋒將仲唔把握機會騷哥利咩？撐2.2倍「讓主」。

（廣東體育周三凌晨2:30直播）
秘魯態沉鬥心成疑

瑞士前鋒施費洛域近年上陣機會唔少，可惜呢位皇蘇前鋒唔爭氣，連續7場國際賽食白果。如果佢唔想到時去到巴西睇多過踢，今場就一定要醒醒定定交足功課，使驚佢落場唔搏？

至於今季喺紐倫堡打響名堂嘅小將祖斯比迪米斯，唔止做咗德甲射手榜「三哥」，返到國家隊同樣咁Sharp醒，披甲6次入3球。佢上仗鬥牙買加後備上陣建功，幫國家隊1:0砌低對手。只要佢保持呢個水準，相信希帥會樂意畀佢喺世盃擔大旗，加埋後備前鋒加雲洛域都想喺呢場「正選爭奪戰」突圍，大家可以坐定睇佢哋鬥法。

對手秘魯班球員無欲無求，鬥心成疑，而且呢班波已經連續7場不勝兼失咗14粒，對住要搏命嘅瑞士真係信唔過囉！