英格蘭勝券在厄

猪拉多纳

邁阿密風暴過後 抖夠出擊

英格蘭於美國邁阿密第一場熱身賽對手將係「高原勁旅」厄瓜多爾，雖然「三獅軍團」抵達邁阿密後即遇上狂風暴雨，首課操練被迫取消，今場波又少粉絲入場撐場，不過都無礙英軍取勝，皆因對手厄瓜多爾喺高原主場係「龍」，嚟到邁阿密就會變「蟲」，科娜一於撐「三獅兵」捉「蟲」﹗

（TVB 301周四凌晨3時直播）
鶴臣玩輪換 副選爭表現

英格蘭大軍日前浩浩蕩蕩抵達美國邁阿密，將會開始為期一周操練，點知撞正當地暴風季節，諗住落場操練就遇上狂風暴雨，英軍冇辦法落草地，惟有匿喺邁阿密巴利大學入面做Gym，認真黑仔。冇得操練就梗係冇咁好，但「一個銀仔兩個面」，佢哋由倫敦坐咗9個鐘機先到邁阿密，舟車勞頓，唔使操抖吓都係好事嚟嘅！

足球喺美國始終唔係一項好受歡迎嘅運動，而且英格蘭今場對手又只不過係厄瓜多爾，吸引力大減，英國《獨立報》就話能容納75,000名觀眾嘅太陽生活體育館今場只有大約1萬名球迷入場，堂堂「三獅軍團」對住一排排空櫈踢都真係幾冇癮！不過又唔使擔心英軍會冇心機踢，因為「三獅」主帥鶴臣今仗賽前表明大部分上場對秘魯正選上陣嘅球員今場都會做後備，由副隊長林柏特帶領一班副選如菲爾鍾斯、阿歷士張伯倫、占士米拿、列基林拔等上陣，佢哋為爭取表現都會落力踢嘅，爭勝心不減。
厄瓜多爾離高原即死

厄瓜多爾正一係「地頭龍、作客蟲」，能夠進軍世盃決賽周都係靠其2,800多米高海拔主場玩謝對手，一落番平地就無力作惡，喺中場大將沙根度卡斯迪路因傷缺陣嘅情況下，厄軍要靠晒曼聯翼鋒路爾斯華倫西亞一個，中場欠組織核心，防線又欠缺高質素球員，今場對住「三獅」副選都一樣搞唔掂，捧英軍勝！