卡雲尼掛帥一樣掂 烏拉圭捧得洛手

猪拉多纳

上屆世盃殿軍烏拉圭，明早會喺熱身賽主場出戰歐洲球隊斯洛文尼亞。烏拉圭王牌蘇亞雷斯仍因傷倦勤，好彩仲有卡雲尼撐住，呢位聖日耳門球星難得擔正打中鋒，撞正無心戀戰嘅斯洛文尼亞唔會腳軟，直取讓球主勝。

（TVB 302周四早上7時30分直播）
頂替阿蘇必演身價

烏拉圭王牌射手蘇亞雷斯因整傷半月板要抖一輪，預計佢未能趕及分組賽首仗對哥斯達黎加復出。不過「哨牙蘇亦自動自覺做物理治療，康復進度良好，呢個消息無疑振奮軍心。其實「哨牙蘇」唔使咁心急，畢竟烏軍仲有聖日耳門箭頭卡雲尼及老將科蘭撐住，尤其係前者一直都想踢中鋒位，但礙於蘇亞雷斯太弗而被迫讓路，如今「哨牙蘇」受傷，卡雲尼名正言順擔正掛帥，仲唔趁機一騷哥利，證明自己一樣咁掂咩？

除此之外，烏拉圭後備席仲有秘密武器史杜安尼，日前佢喺熱身賽對北愛爾蘭下半場入替老將科蘭，即接應卡雲尼嘅妙傳一箭定江山，睇嚟佢同卡雲尼都幾夾喎，呢位愛斯賓奴前鋒狀態唔錯，甚至搶埋科蘭嘅正選一啲都唔奇。
斯洛文尼亞戰意鬆懈

斯洛文尼亞冇份踢世盃，今次國際賽期純粹係陪太子練波，就算召入漢丹洛域同路華高域等好手都冇用，因眾將早已處於等抖暑心態，上仗對住攻力疲弱嘅「沙漠之狐」阿爾及利亞亦要淨吞兩蛋，戰意之鬆懈可見一斑，今仗都唔慌搏命，相信烏拉圭可以輕取對手，讓球主勝咪錯過。