荷蘭攞威壯行色

猪拉多纳

最後一場拍跳搵弱旅祭旗

荷蘭今晚於阿姆斯特丹阿積士球場和威爾斯進行決賽周前最後一場熱身賽，雖然荷蘭最近兩場只入兩球表現唔算突出，不過翻查紀錄佢哋過去三次出戰大賽前都能在主場大勝一仗壯行色，威爾斯今仗仲要缺少加里夫巴利及艾朗藍斯兩大王牌，作客荷蘭難有還擊之力，讓球主勝可放心捧場。

（無綫翡翠台周四凌晨2時30分直播）

荷蘭對上兩場先後約戰厄瓜多爾、加納兩支決賽周隊伍，結果取得一勝一和。射手尹佩斯連續兩場都有士哥，狀態保持得唔錯，洛賓、亨特拉爾、古積特及史奈達等主力亦冇傷冇病，攻力有保證。波童相信荷蘭今次安排威爾斯作為最後一場熱身賽對手唔係求求其其，因為佢哋對上三次出席大賽決賽周，包括08歐國盃、10年世界盃及12年歐國盃，最後一場熱身賽都係安排於主場舉行，而且對手同屬歐洲二線尾、三線頭球隊，論實力根本唔係荷蘭嗰皮，咁做擺明係要喺主場球迷面前大勝一仗，增強球迷及球員信心。
威爾斯殘陣 巴利No show

前富咸領隊高文接掌威爾斯帥印後，帶領球隊踢咗16場國際賽，共取得五勝三和八負，輸波率達五成，成績一般。王牌加里夫巴利今仗聲稱有傷避戰，但轉頭又高調前赴印尼出席商業活動，據報高文私底下頗有微言，似乎佢仲未夠牙力叫旗下球員幫佢賣命，另一中場重心艾朗藍斯同樣因傷倦勤，單靠今仗擔任隊長嘅利物浦中場祖阿倫領軍，實有獨力難支之感，再加上喺史雲斯演出獲好評嘅艾殊利威廉斯亦未有入選，殘陣之下難有反抗之力。

睇番剛才提及嘅三場決賽周前最後熱身賽，荷蘭兩次於阿積士球場都能攻入對手6球，今次再於福地出戰，可以一試「主其他」波膽。