阿根廷就住踢難炒千里達

猪拉多纳

剛公布世界盃23人大軍名單嘅阿根廷，聽朝將喺主場同千里達進行球隊首場世界盃熱身賽。由於阿根廷已落實世界盃大軍名單，一眾球員為咗避免受傷，今仗未必會出盡全力踢呢場熱身賽。而作客嘅千里達明知球隊實力有限，今仗相信輸少當贏，阿謙估計今場入波唔會多，一於捧入球細。

（TVB 301周四早上6時30分直播）
人腳定晒 唔使博表現

阿根廷剛喺尋日公布咗世界盃23人大軍名單，一如所料美斯、阿古路同希古恩等巨星皆悉數入選，而後衞奧達文迪、中場班尼加及荷西蘇沙則遺憾落選無緣出戰巴西世界盃。今仗係阿根廷嘅首場世界盃熱身賽，由於球隊已落實23人名單，邊緣球員唔使再為自己能否入選世界盃大軍而搏命，至於一眾星級球員為免喺熱身賽受傷而影響世界盃嘅上陣機會，相信亦唔會去到盡，今仗隨時入一兩球就Hea踢等完場。

千里達今仗千里迢迢去到阿根廷踢熱身賽，陣中最具名氣嘅相信係効力卡迪夫城嘅前鋒堅韋尼鍾斯，其他球員都屬名不見經傳。千里達球員深知球隊實力同阿根廷有一段距離，今仗客場出戰相信會死守到底但求輸少當贏，主W賠率冇肉食下，阿謙今仗捧入球細。