革命劏牛好時機

猪拉多纳

卡希爾備戰世盃放大假

今日冇乜波玩，好彩仲有美職撐起，明早頭場新英倫革命主場迎戰紐約紅牛，紅牛雖有法國名將亨利壓陣，畢竟呢位前一級射手年事已高，演出難免跌Watt，好拍檔卡希爾又返咗澳洲國家隊備戰世盃，冇咗呢個進攻核心影響極大，遇上主場弗爆嘅東岸一哥新英倫革命凶多吉少，主勝乃不二之選。

（TVB 301周一清晨5時直播）

紐約紅牛貴為美職名牌球隊，羅致亨利、卡希爾、盧恩杜拉及巴利胡禮菲臘斯等曾喺歐洲搵食嘅球員，可謂星光熠熠。不過老老實實，呢班球員已經過咗職業生涯嘅高峰期，以亨利為例，上季佢仲入到10粒帶領紅牛奪東岸冠軍，但踏入今季，呢位前阿仙奴射手入得3球咁大把，畢竟佢已經36歲，狀態、體能冇咁弗正常不過，最慘係前線好拍檔卡希爾亦返咗澳洲國家隊，備戰嚟緊嘅巴西世盃，呢位老袋鼠係紅牛組織進攻嘅核心，球隊近三仗冇咗佢錄得一和兩負，即時死晒火，其重要性可見一斑。相反新英倫革命捱過季初低迷後，演出漸入佳境，唔單止位列東岸榜首，佢哋之前七仗主場未輸過，近四仗喺自己地頭仲贏晒添，食住個勢，絕對唔赦「紙老虎」紅牛，主勝咪錯過。
當路雲有火搵芝華士發洩

另一場由洛杉磯銀河主場硬撼美國芝華士，落選美國大軍嘅銀河前鋒當路雲谷住道氣，近兩場狂轟三粒，擺明向美國領隊奇連士文示威，預計呢團火會繼續Keep住燒落去，加上銀河主場四連勝氣勢如虹，況且兩支球隊近六次交手，銀河未輸過仲贏咗五次，明顯食住美國芝華士喇，相信可輕取對手，讓球主勝捧得過。

（TVB 301周一早上8時直播）