強悍加納細頂南韓

猪拉多纳

陷入球荒Vs怕傷唔弗

臨近世盃，列強頻頻搵人拍跳備戰，「太極虎」南韓聽朝會喺美國邁阿密中立場，約戰另一支世盃分子「黑星」加納。「太極虎」狀態飄忽，吸取上仗賠了夫人又折兵嘅經驗，為免再添傷兵定必就住嚟踢，撞正近期陷入球荒嘅加納，隨時悶戰一場，入球細乃不二之選。

（TVB 301周二早上7時直播）

雖然名宿洪明甫帶領過南韓U23勇奪2012年奧運銅牌，但佢接手一隊後戰績麻麻，近六仗輸咗四場，上仗熱身賽迎戰冇份踢世盃嘅非洲球隊突尼西亞，唔單止因一次後防失誤輸波，兩名守將金鎮秀及洪正好亦受傷收場，前者更因傷緣盡世盃，由朴柱昊代替，眼見近期世盃列強踢熱身賽搞到傷兵成災，洪帥都想班波齊齊整整出征巴西，相信今仗唔會搏盡。
太極虎缺精神領袖

與世盃H組對手比利時、俄羅斯及阿爾及利亞相比，「太極虎」南韓嘅世界排名（57）係最低，亦未見同組對手積極吼路，洪明甫賽前話咁係一件好事：「佢哋忽視南韓，從戰略上對我哋有利。」但洪帥仍未解決「太極虎」欠缺精神領袖嘅問題，無論係隊長具滋哲、奇誠庸定朴主永，都與已退役嘅「星仔」朴智星差成條街，難怪被其他對手忽視。
黑星穩健但唔識入波

不過加納亦唔好得幾多，近期刻意收起在阿聯酋搵食嘅射手基恩，轉用今季於索察復甦嘅佐敦阿休出任箭頭，可惜效果麻麻，近四仗未贏過之餘，竟然一球都入唔到，好彩「黑星」仲有奇雲保定、蒙達利、艾辛、卡華禾艾沙姆等悍將，令中後場演出穩健，近六仗只失兩粒可見一斑，相信會keep住強悍作風。當怕傷唔弗嘅「太極虎」，遇上陷入球荒嘅「黑星」，今仗唔慌多士哥，轉玩細盤好過。