紅運飛駒返沙田搏

猪拉多纳

　　沙田上演夜馬，以前就話光線唔多夠，跑道有黑影，有啲馬演出水準忽然大跌，但依家光到好似日頭咁，仲有啲實力馬會冇影，真係好古怪，就係因為難捉摸，阿棟認真怕怕，通常見到呢啲場合，玩兩手就算，唔中係應份，贏就係僥倖。

　　第三場四班1200米草地。「紅運飛駒」跑來跑去得個桔，近3仗熱又叮、冷又瓜，唔通係次貨？呢個可能我唔會排除，之不過，隻馬只係3歲，仲係細路仔，話唔埋下季先至大熟發出光芒。

　　不過，呢場由谷草轉回沙田，變身唔奇，因為蔡神仙好興將啲年青馬兜個圈，跑幾場谷草累積經驗，之後返沙田殺馬，何況，今場用到雷神，冇理由係充大頭鬼啩。

　　第七場三班1650米泥地。「國粹精華」咬實牙根搏落去，都係二二三三，呢匹自購馬實力唔慌叻得去邊，最多都係三班中堅。

　　跑完上場，唔揀谷草，又唔返沙田，專登轉戰泥地，米高鄭做法好啱，假假哋當日初跑呢項路程輸畀「風雲」咋，證明係有料。季尾為要交差，轉泥令贏面增加，如意算盤希望打得響，可作馬膽。

　　熱爆男有實力

　　第八場二班1650米泥地。「熱爆男」今季只得3場第二，成績唔算好，冇馬贏講咩都假，所以，時近季尾，唔到練馬師唔諗計。

　　此駒今次正正路路回到此程，梗係好過走去快活谷，話晒之前同程曾與「如你所願」鬥到埋門一兵一卒而僅敗，實力在此賽點會被比下去。

　　（陳華棟 資深評馬人）