智利澳洲細演拉鋸戰

猪拉多纳

維達爾負傷難發電

另一場B組首輪賽事，智利於庫亞巴硬撼澳洲。論實力智利的確贏成條街，不過主力維達爾因傷好大機會缺陣，一味「攻呀攻呀快搶攻」嘅智利冇咗呢部中場發電機，遇上防守嚴密嘅「袋鼠兵團」，隨時老鼠拉龜冇碇埋手，今場推介入球細。

（TVB 13、TVB 19、now 818及840周六早上6時直播）

智利連續兩屆躋身決賽周，上屆於名帥比爾沙帶領下，喺分組賽與後來奪冠嘅西班牙齊齊出線，今屆咁蹺又同後者同組，被視為阻截「鬥牛國」及荷蘭嘅攪局分子。經過四年於歐洲豪門歷練後，維達爾、阿歷斯山齊士等上屆主力漸趨成熟，加上同屬南美洲早已適應巴西氣候，本來有力左右B組大局，可惜維達爾因右膝半月板受傷，喺五月頭先做完手術，以為上場熱身賽對北愛可後備入替係天大喜訊，點知近日佢只能獨自進行一啲輕量訓練，未能跟隨大軍練習，情況唔多樂觀。
袋鼠兵睇餸食飯玩死守

作為防中，維達爾周身刀張張利，唔單止攔截兇悍，體能充沛滿場飛，左右兩邊、甚至中堅都可客串，配合其神不知鬼不覺嘅後上入楔，全能到爆。智利採用3412陣式崇尚進攻，以流暢傳球及不斷跑動壓迫對手，但失去中場發電機維達爾，能否再踢出呢種侵略性頓成疑問。澳洲處於青黃不接，尤其係前線最為嚴重，仲要靠去咗美職搵食嘅34歲老將卡希爾攻堅，因此主帥普斯迪高路惟有睇餸食飯，除咗用較為保守嘅451陣式外，上仗熱身賽對克羅地亞只係下半場入替嘅賀路雲，今仗會正選披甲拍住隊長積甸拿克，喺防線前築起一道屏障，希望全民皆兵頂住對手，況且智利欠缺一名具級數嘅射手，對住死守嘅「袋鼠兵團」必陷於苦戰，拉鋸局面唔慌多波入，主勝得1.4倍熱而不穩，轉玩有1.68倍嘅細盤好過。
特別項目吼A山入波

智利今仗進攻會靠晒阿歷斯山齊士（A山），預計佢會肩負起球隊嘅入球重任，首先發生在A山嘅特別項目「入球」有2.25倍咪嫌少呀。
袋鼠兵遇南美波食白果

呢場將會係南美洲國家智利第30場世盃賽事，智利喺進入21世紀之後就再冇同澳洲碰頭，之前雙方曾經四次交手，智利取得3勝1和佳績，明顯食住澳洲，值得留意嘅係，4場入面有3場係開出半場和。而澳洲從未喺世盃對住南美洲國家入波。
一場波判三個12碼

科特迪瓦嘅杜伊04年成為國際球證，現時係非洲大賽常客，11年當選非洲最佳球證，於當地甚具名氣，平時執法尺度未算太嚴，但於關鍵時刻絕不手軟，上年世青盃16強希臘對鳥茲別克單場派出5黃2紅，還判罰咗3個12碼，幾乎以一人之力影響整場賽果。