蠻牛老火湯嗒落夠味

猪拉多纳

橙軍Sell青春活力

「肥仔德」係筆者30年前剛啱入行時候，一眾行家幫我起嘅花名，當時我的確係人如其名。記得前兩日嚟到《東方日報》規模宏大嘅總部時，見番啲舊日行家，佢哋都改唔到口叫我「肥仔德」，真係好有親切感！就正如同「皮蛋黃」識咗咁耐，大家一齊講過無數咁多場重要球賽，但以今次世界盃最有feel，我哋會拍住上喺呢度唱雙簧，而且我仲會揭秘式咁講下Peter喺鏡頭後嘅得意嘢添！
兩強和波 盞益智利

言歸正傳，一場應該係決賽嘅戲碼，竟然提早喺第二日分組賽上演，「蠻牛」西班牙同「橙軍」荷蘭都真係唔輸得，假如今場最終出現和波賽果，盞益咗喺後面虎視眈眈嘅智利！我同Peter為呢次世界盃做足加零一嘅準備工夫，同時評述過好多場熱身賽，如果用煲湯嚟形容呢兩隊波，「橙衣軍團」就似一啖滾湯，而「蠻牛部隊」就似一碗老火湯。

荷蘭大軍名單入面一共有九位「90後」生力軍，正如拍檔Peter所講，佢其實好鍾意群埋成班後生仔，因為夠晒活力又充滿生氣，只不過就怕喺關鍵時刻輸經驗。相反西班牙只有兩個「90後」兵，似足Peter咁「愈嗒愈有味」，究竟會唔會畀荷蘭呢班後生仔打亂章搞寸個party呢？一場咁精彩嘅賽事，大家都係捱眼瞓睇波啦！