意大利走晒樣三獅兵要捧場

猪拉多纳

世界盃嚟到第3日，「死亡D組」開打，英格蘭決戰意大利。坦白講，我就唔認為呢兩隊有力問鼎冠軍，但係我同好多香港球迷一樣，對英格蘭呢隊波有情意結，無論佢哋令人失望幾多次，大家總會有「可能今次得呢」嘅想法，尤其係今場對住今非昔比嘅意大利，點都要捧番一次場。足智彩讓球開平手，我撐英格蘭！

（無綫翡翠台、明珠台及TVB13、now818台、中央5台周日早上6:00直播）

英超係最受香港球迷歡迎嘅聯賽，連帶英格蘭國家隊亦深受愛戴，可惜呢隊波每次出席大賽，都係雷聲大、雨點小，大家對佢哋希望愈大就失望愈大。今次又點呢？雖然大家都認為冠軍應該不離巴西、西班牙同德國幾隊，但當見到朗尼、謝拉特、赫特同林柏特呢啲幾乎每個星期都會睇到嘅英超球星，又不期然會對「三獅兵」有期望。
迪施基利奧受傷入院

我相信自己算係理性嘅球迷，冠軍就唔會諗喇，但今場對住意大利，就點都要捧英格蘭啦！先唔理啲報道話英格蘭家陣士氣幾好、利物浦進攻模式有幾勁，同領隊鶴臣有咩奇招制勝。淨係睇對手意大利今時今日，仲要靠派路同保方，就已經畀到英格蘭躉信心啦！

況且佢哋個後衞迪施基利奧前日操練受傷入院，據報今場肯定唔踢得，一度有傳意大利想換人，不過柏蘭迪利最終都決定等佢復出，希望佢趕及之後2場比賽上陣。

英格蘭史達寧有料到

與其話今場波兩隊實力接近，倒不如話兩隊各有各問題，但相比之下，英格蘭嘅問題算係無咁大影響，韋碧克唔弗、阿歷士張伯倫有傷，咪用列基林拔、史達寧囉！無問題喎，一於捧場啦！
Data King：13次打入決賽周

‧英格蘭曾打入13次世盃決賽周，1次奪得冠軍。

‧踢過59場決賽周賽事，錄得26勝19和14負，總共攻入77球，失51球。

‧喺近兩屆世盃決賽周6場分組賽中，取得3勝3和成績。

‧今屆世盃外圍賽喺歐洲區H組攻入31球，成為小組之冠。
Data King：4次奪世盃冠軍

‧意大利曾17次，並已連續14次打入世盃決賽周，4次奪得冠軍。

‧踢過80場決賽周賽事，錄得44勝21和15負，總共攻入126球，失74球。

‧近兩屆決賽周6場分組賽，錄得2勝3和1負成績。

‧今屆外圍賽歐洲區B組攻入19球，成小組之冠。
乜都玩錦囊：兩軍料穩守捧細

有睇開鶴臣執教嘅球隊都知，呢位老帥戰術出名保守唔會喪攻，尤其嚟到世界盃呢啲重要賽事肯定會先穩守，至於冇咗後防大將迪施基利奧嘅意大利為防畀「三獅兵團」反擊得手，睇怕都唔敢貿然進攻，1.4倍入球細做過關膽最啱。