哥倫比亞射手多 老虎冇嚟都識打臘

猪拉多纳

哥倫比亞因為前鋒法卡奧未傷愈趕唔切復出退隊，慘變「冇牙老虎」。佢哋將會喺C組首戰撼希臘，雖然進攻重心之一嘅古亞連停賽，但係仲有唔少猛將可以攻破希臘防線！哥軍今場讓一球，一於捧3.2倍嘅「讓球主勝」！

（無綫翡翠台、明珠台及TVB13、now818台、中央5台周日凌晨0:00直播）

「老虎」法卡奧因為十字韌帶傷仲未好得晒，最後只可以讓個位出嚟，令到唔少哥國球迷心碎。不過，佢哋仲有杜費路古迪利斯、積臣馬天尼斯同卡路士巴卡等多名「數胡好手」爭住上位。雖然哥軍另一個重要球員古亞連，今仗又要坐波監，對攻擊力確實有一定影響，但係中場進攻仲有古達度同占士洛迪古斯兩隻快馬，可以為前鋒鋪橋搭路。
希臘老將多 鋒力疲弱

表面睇哥倫比亞算係C組實力最強，但係同另外3隊比較又未至於大超班，所以首戰對希臘一定會搏到盡，力求有3分落袋先。

另邊廂，希臘全隊冇傷冇病冇停賽，可以夫添出擊，不過隊長加拉高尼斯同加素蘭尼斯兩位中場重臣，年紀都已經唔細，可唔可以喺巴西嘅高溫環境下，踢足全場都成問題。而且希臘攻擊力一向弱過「藥煲」，久守必失，要全場頂住哥倫比亞嘅快攻真係唔容易。如果希臘失波之後谷得太前，隨時可能失多幾粒添，所以呢場都係博哥倫比亞「讓主」有着數喎！
Data King：南美外圍賽最守得

‧哥倫比亞喺1994、1998年世盃決賽周6場分組賽，取得2勝4負成績。

‧參與過13場世盃決賽周賽事，錄得3勝2和8負，夾埋攻入14球，失23球。

‧曾4次打入決賽周，只有1990年一屆躋身16強，其餘全部分組賽止步。

‧哥倫比亞喺今屆世盃外圍賽僅失13球，係南美洲失球最少球隊。
Data King：決賽周6仗僅1勝

‧希臘只曾踢過1994、2010年兩屆世盃決賽周，錄得1勝5負成績，共入2球，失15球。

‧希臘曾兩次打入世盃決賽周，同樣喺分組賽出局。

‧今屆世盃外圍賽僅失4球，以第二失球少，緊隨3個失球嘅西班牙。

‧希臘同哥倫比亞嘅對賽戰績只有一次，當時哥倫比亞以2:0勝出。
乜都玩錦囊：戰況料慢熱吼半和

哥倫比亞雖然實力高過希臘，但係要打破對手防線都唔係咁容易，而且呢場始終都係雙方首場比賽，所以上半場料踢得比較謹慎，上半場隨時打和，所以不妨試吓1.95倍嘅「半和」。