阿根廷預咗爆大鑊

猪拉多纳

辣着「歐洲火藥庫」波斯尼亞

兩屆冠軍阿根廷喺世界盃分組賽首度出擊，喺F組面對「新丁」波斯尼亞，當然想贏波響頭炮。阿根廷陣中兩大王牌美斯同阿古路喺早前熱身賽養精蓄銳，今仗強勢復出有力攻破「波黑」大門。不過，歐洲火藥庫」波斯尼亞火力絕對唔失禮，前線有王牌射手迪斯高攻堅，加上中場米斯莫域、沙利荷域同夏積奴域全部都有入波能力，加上首次參賽完全冇壓力，面對防線未算穩陣嘅阿根廷有力取得入球，今仗玩入球大好路。

（TVB13、now 818及840周一早上6時直播）
中場三域支援迪斯高

「潘帕斯雄鷹」阿根廷被視為今屆世界盃奪標熱門之一，球隊攻擊火力自然係球迷焦點，主帥沙貝拉對兩大王牌美斯及阿古路尤其愛護有加，兩人喺近兩場熱身賽嘅上陣時間唔多，明顯係唔想愛將喺無關痛癢嘅熱身賽搞到受傷，希望佢哋養精蓄銳喺決賽周搏殺。阿根廷賽前突然「變陣」改練532陣式，球隊對上一次熱身賽對「波黑」正是以此陣式贏波，沙貝拉似乎有意學習大炒西班牙嘅荷蘭咁放棄傳統陣式，希望藉戰術嘅改變以收出奇制勝效果。

波斯尼亞因上世紀90年代飽歷戰亂而有「歐洲火藥庫」稱號，今次首次喺世界盃大舞台亮相，一眾球員嘅心情相信係既緊張又興奮。事實上波軍中前場攻擊力又確係有如火藥庫，其中最有名氣嘅要算係踢緊英超曼城嘅射手迪斯高，呢位同阿根廷主將阿古路係球會隊友，亦係曼城近3年兩奪英超冠軍嘅功臣，射術如何相信唔使多講。而中場佢有強大嘅支援，如沙利荷域同夏積奴域都有後上射門能力，中場指揮官米斯莫域則善於主射罰球，有呢「波黑三域」加埋迪斯高，要攻陷阿根廷大門應並非太難。

睇好阿古路先發入球

事實上，阿根廷係典型攻強守弱嘅球隊，防線存在唔少隱憂，當中以主將加雷近期受傷患困擾影響最大，就連近兩場熱身賽都踢唔到。雖然賽前有消息指加雷已復操，但其狀態始終未回復十足，成為防線隱憂，更何況波斯尼亞因首次出席大賽而一致被睇淡，可謂「冇嘢可以輸」，故估計會放膽同阿根廷鬥攻，雖然未必爆到冷，但斷估唔會食蛋，因此1.7倍入球大值得支持。

另外，兩軍去年11月喺熱身賽交手時，阿古路曾梅開二度助阿根廷贏2比0。今次波斯尼亞嘅防線同上次交手時冇太大分別，相信阿古路大有機會再次取得「士哥」，先發事件可以投X這位曼城射手取得入球。
MARK實佢：阿根廷中場 迪馬利亞

迪馬利亞今季喺皇馬嘅翼鋒位置發揮穩定，雖然佢喺阿根廷陣中逐漸變成中場球員，但佢隨時能化身成翼鋒製造殺機，喺比賽陷入僵局時，將會係「潘帕斯雄鷹」前線一件秘密武器。
MARK實佢：波斯尼亞中場 米斯莫域

米斯莫域曾經係2008至09年球季德甲助攻王，雖然而家踢緊中超，但仍然係波軍中場指揮官，佢亦係死球專家。如果今屆世界盃能夠取得入波，將會成首位喺世界盃入波嘅現役中超球員。
歷來只對過2次阿根廷贏晒

雙方過去只曾兩次於熱身賽交鋒，阿根廷獲得全勝，共攻入7球，兼保持不失。其中上年喺美國碰面，阿根廷憑阿古路梅開二度，以2比0勝出。值得一提，阿根廷早前同另一支巴爾幹球隊斯洛文尼亞踢熱身賽，亦係贏2比0。
艾古拿中美洲名哨初擔正

國籍：薩爾瓦多　　

年齡：38

曾執法大賽：07世青盃、07世少盃、11世冠盃、13洲際盃

簡介：艾古拿係中北美洲及加勒比海地區當紅球證，每逢大型賽事舉行都必定有佢份，而且亦曾07年執法07年美洲金盃、世青盃同世少盃等賽事。艾古拿上屆世盃有份被選入球證名單，不過只係擔當後備球證，最終無緣落場執法，今屆終於有機會擔正，一圓世盃夢。

執法場數：89

黃牌數：381

紅牌數：29

判12碼：17

平均黃牌：4.28

平均紅牌數：0.33

平均判12碼次數：0.19
美斯謙推介：入球大