最令人「葡萄」球星梗係Ｃ朗

猪拉多纳

喺Facebook入面，你可以設定自己嘅「感情狀況」，其中一個係「It's complicated」（一言難盡），其實男人同足球嘅關係，都係「一言難盡」。

正如星爺喺西遊記對住紫霞仙子講，「如果係都要喺呢份愛加上一個期限，我希望係一萬年」，唔少男人對足球嘅愛都係如是，因為男人同足球實在可以變成好多個可能。如果你鍾意落場踢番兩腳，入咗波或者交出靚助攻，嗰種興奮係無可媲美，如果你守龍門撲出一個必入波，嗰種滿足感好過食咗餐好嘅。又如果你鍾意投X，中咗個幾百倍波膽，嗰份招積及自滿，同拖住個靚女出街一樣咁令身邊人眼紅。

講起眼紅，當今世上最令人「葡萄」嘅球員，我諗都係C朗。球技好唔好可能大家有唔同見解，但佢鬥心一流，入咗波除衫騷肌肉嗰吓，作為男人心底都不禁講句：「使唔使咁型呀？」身邊女人伊蓮娜更係每個男人都想得到嘅尤物，唔單止樣靚身材正，眉宇間嗰種媚態，真係引鬼死人。

葡萄牙並非熱門，實力亦唔稱得上係強隊，捧世界盃可能無份，但身為男人搵個球星作投射，我一定揀C朗，試幻想一下，贏完場波離開球場，成班人圍住自己當英雄，又合照又簽名；返到屋企仲有個伊蓮娜咁嘅女人等緊自己，wow，爽呀！