法國黃金拍檔 半W開「洪」盤

猪拉多纳

法國上屆分組賽出局，搞到一地眼鏡碎，好彩佢哋今屆抽到上籤，喺E組對手只係瑞士，厄瓜多爾同洪都拉斯，今晚法國對住同組實力最弱嘅洪都拉斯，肯定一開波就喪攻，留力過兩日鬥瑞士，法國半W有1.83倍，抵捧！

（無綫翡翠台、明珠台、TVB13及now818台、中央5台周一凌晨3:00直播）

世盃前夕，法國主力列貝利喺加強體能訓練嗰陣整親背傷舊患，宣布緣盡世盃。之不過，「塞翁失馬，焉知非福」，冇咗列貝利嘅法國，進攻反而流暢咗，由中場一腳就分去兩邊，又或者突破越位，喺出發去巴西前嘅最後一場熱身賽，法國就以8:0怒炒牙買加，需知道法國呢場熱身賽嘅目的，就係用嚟模擬今晚對洪都拉斯，斷估牙買加同洪都拉斯實力唔會差太遠啩？
洪都拉斯射手 冇大賽經驗

列貝利打柴，最大得益者肯定係賓施馬同基奧特。事關呢對鋒線拍檔，上仗全場眉來眼去，唔使等列貝利餵，反而仲配合得絲絲入扣，絕對係今屆世盃其中一對黃金拍檔，特別係首次出戰世盃嘅基奧特，上季尾狀態弗到冇朋友，我對佢好有信心o架！

洪都拉斯陣中冇咩球星，中場柏拉西奧斯算係其中之一，另一件就係前鋒謝利賓特臣，佢喺12場外圍賽射入9球，但27歲嘅佢同基奧特一樣，都係第一次參戰世界盃，冇大賽經驗，但又唔學似基奧特咁身邊有咁多猛將幫手，面對近6戰全勝一球不失嘅法國，好難有運行。原本上盤同「讓球主勝」都博得過，不過考慮到法國下仗就要硬撼瑞士，今晚有可能快刀斬亂麻，半場咧住1粒就歎慢板，既然半W都有1.83倍，梗係抵玩過上盤啦！大家亦可以玩埋半全場「主主」，有1.92倍，都OK o架。
Data King：法國外圍賽入波王

‧法國曾經13次打入世盃決賽周，並奪得1次冠軍。

‧踢過54場決賽周賽事，錄得25勝11和18負，總共攻入96球，失68球。

‧近2屆世盃決賽周6場分組賽，錄得1勝3和2負。

‧法國今屆世盃外圍賽歐洲區I組攻入15球，係小組之冠。
Data King：洪都拉斯分組賽例衰

‧洪都拉斯曾2次打入世盃決賽周，同樣喺分組賽出局。

‧踢過6場決賽周賽事，錄得3和3負，總共攻入2球，失6球。

‧洪都拉斯喺今屆世盃外圍賽中北美洲及加勒比海區，只係攻入13球，但就失咗12球。
乜都玩錦囊：博法國大手交易

法國今場對住洪都拉斯，要贏應該冇問題，事關佢哋冇咗列貝利，反而踢得更快更順，實力又高洪都拉斯幾班，隨時會大炒對手一場。今場入球中位數只係2.5球，入球大有2.02倍，抵捧！