超霸鷹伊朗吼半場和

猪拉多纳

手寒腳凍睇定嚟踢

世界盃分組賽F組賽事，由「波斯鐵騎」伊朗喺庫里蒂巴迎戰「超霸鷹」尼日利亞。伊朗喺前葡萄牙主帥奎羅斯帶領下踢法偏向防守，分組賽首度亮相未必會主動搶攻。應屆非國盃冠軍尼日利亞首仗遇上實力較弱嘅伊朗，理應係全取三分嘅好機會，但球隊喺熱身賽表現平平；而且比賽地點庫里蒂巴嘅天氣較凍，預測氣溫只有12度，對一向習慣喺炎熱天氣環境作賽嘅尼日利亞同伊朗嘅發揮都會有所影響，兩軍上半場都未必會採取主動，半場和捧得過。

（無綫翡翠台及明珠台、TVB 13及19、now 818及840周二凌晨3時直播）

伊朗喺亞洲區外圍賽雖然以首名晉級決賽周，但入球能力備受質疑，皆因佢哋八場賽事只係入得八球。不過，「波斯鐵騎」嘅防守就非常穩固，八場賽事只係失咗兩球咁大把，可見佢哋係一支守強攻弱嘅球隊。伊朗主帥奎羅斯當然明白球隊嘅長處，相信會指示隊長尼古納姆由中場開始採取防禦工作，務求先做好防守，再靠前線球員伺機打反擊，上半場應會踢得較為保守。

「超霸鷹」尼日利亞過往球風非常凌厲，不僅攻守轉換快，而且球員速度亦非常高。然而，如今嘅尼日利亞變得非常講求控球在腳，球員帶住個波「死衝」嘅畫面愈來愈少。「超霸鷹」現時以車路士防守中場約翰米基爾為重心，此子擁有極強嘅大局觀同閱讀賽事能力，能適當控制全隊節奏，球隊喺佢帶領下相信會踢得更有紀律性，唔會胡亂主動搶攻。
最低12度有機會水戰

值得一提的是，今次賽事舉行地點庫里蒂巴嘅天氣唔似一般巴西嘅天氣咁炎熱，比賽日預計最高氣溫只得21度，最低更有機會得12度，而且仲有機會落雨。呢種天氣對來自中東嘅伊朗同非洲嘅尼日利亞嚟講，係比較難喺短時間適應，相信兩隊都希望熟習咗球場及溫度後先採取進攻，上半場應該會踢得比較保守，半場和值得支持。

另外，尼日利亞前鋒奧丹維治已年屆32歲，未必有足夠體力應付90分鐘賽事，尤其喺近兩場熱身賽正選上陣皆未能踢足全場，今仗相信亦唔會例外，不妨考慮特別項目嘅奧丹維治「被換出」。
MARK實佢：伊朗中場 迪查加

迪查加早年喺德甲打滾並喺禾夫斯堡踢出名堂，2012年轉投英超富咸，成為第三位喺英超搵食嘅伊朗球員。迪查加今季雖最終無法協助富咸護級，但數次後備上陣，憑其重炮射入過幾個金球，話唔定喺世界盃決賽周成為球隊奇兵。
MARK實佢：尼日利亞指揮塔 約翰米基爾

約翰米基爾喺車路士中場雖非核心主力，但喺國家隊就要肩負領袖角色。作為尼日利亞中場大腦，約翰米基爾不僅要做好防務，而且要喺「超霸鷹」進攻時給予足夠支援，同時關係到球隊三線嘅銜接，所以角色非常重要。
超霸鷹賀歲波贏過伊朗

兩軍史上唯一一次對賽喺1998年，比賽地點係大家熟悉嘅香港大球場，當年兩軍應邀參加一年一度嘅賀歲波，結果尼日利亞以1比0小勝對手。尼日利亞最近一次同亞洲球隊交手喺去年十月，當時佢哋於熱身賽作客約旦輸0比1。至於伊朗對上一次打入世盃決賽周係06年，同組對手包括另一支非洲球隊安哥拉，最終雙方踢成1比1平手。
華拿揸正嚟做為厄國球證洗底

國籍：厄瓜多爾　　

年齡：37

曾執法大賽：11美洲國家盃、南美自由盃、南美球會盃

簡介：今次係來自厄瓜多爾嘅華拿首次執法世界盃，令不少球迷感到擔心，事關其同胞拜朗摩蘭奴主吹02年世界盃16強南韓對意大利，被指嚴重偏幫東道主南韓，其後又捲入販毒等罪行，令人對厄瓜多爾球證印象非常負面，所以華拿今屆肩負為國家同行洗脫污名重任。

執法場數：65

黃牌數：298

紅牌數：24

判12碼：14

平均黃牌：4.58

平均紅牌數：0.37

平均判12碼次數：0.22
美斯謙推介：半場和