點用老將好考功夫

猪拉多纳

體力輸蝕但經驗搭夠

今屆世界盃嚟到依家真係令Peter嘆為觀止，若然球迷們仍然唔滿意，仲要彈球證出錯、球員踢得曳同教練排陣差，而浪費咗其他精彩絕倫嘅元素，Peter都唔知點講好。

教練點樣用年紀大球員，其實係一門學問。Peter有幸跟過唔少出名教練，對呢樣嘢都有少少研究。綜合咁多名師意見，佢哋認為門將、後防同攔截準嘅位置都唔可以用老將。好似西班牙門將卡斯拿斯咁，33歲嘅佢真係無復當年勇，繼歐聯後再一次喺大賽犯錯。Peter覺得如果係卡斯拿斯後生嗰陣，面對洛賓嘅單刀波絕對可飛撲落去，唔使畀後者玩到「陀陀擰」。
門將年紀大 弊多於利

同樣情況出現喺克羅地亞35歲門將派迪高沙身上，佢面對尼馬射入嘅第一球，雖然捉到腳影，但由於身高成1米93，落地時間始終慢少少，搞到目送皮球入網；至於12碼嗰球雖然捉到路兼拍到個波，亦因手力唔夠救唔到個波。Peter認為如果換咗一個後生門將，或者可以救番呢球波。

點解前曼城中堅李察鄧尼成日擺烏龍得到「烏龍王」稱號？就係因為佢年紀大轉身慢，所以資深嘅教練唔會喺門將同後防位置擺晒老將。當然老將都可以用得好，好似雲格當年用柏金，同科特迪瓦主帥林武治尋日用杜奧巴。老將技術出眾但冇足夠體力應付90分鐘賽事，最好喺最後20分鐘趁對方後衞體力消耗得差唔多，先放佢哋入嚟。呢樣嘢人人都識，但點樣運用就係一門學問。
Peter金句：球員生涯到黃昏的日與夜