意軍部署精密出線穩膽

猪拉多纳

總結英格蘭首仗表現，度士可以用「失望」兩個字來形容，唔係因為佢哋又喺大賽冇料到，而係睇到班球員根本唔落力，心中欠一團火，後防mark人又唔緊，等同一盤散沙，睇來英格蘭球員心理質素弱嘅老毛病仲未解決。如果再冇改善，唔好話爭標，恐怕隨時出唔到線。
英軍心理質素弱未醫好

英格蘭上屆歐國盃對意大利，專注防守，最終互射12碼敗陣，唔算太失禮，但今場有意加強進攻，反而顯得進退失據。派四位進攻球員韋碧克、朗尼、史達寧、史杜列治上陣，但前兩者墮得太後防守，跟本唔適合佢哋踢法。最致命係班球員精神面貌唔好，冇厘鬥心，你可以話天氣濕熱，影響發揮，但英軍大部分球員年輕當打，如果咁都頂唔順，就枉為英超球星。

意大利部署精密，防守分三層，令對手進攻無從入手，反映大賽經驗優勝，出線應該冇問題。同組烏拉圭似有輕敵，導致輸畀被視為最弱嘅哥斯達黎加，受到好大教訓，下輪對英格蘭，成為雙方生死戰。尾場日本上半場演出唔錯，可惜把握力較弱，放虎歸山，被科特迪瓦迅速入兩球反勝，凸顯亞洲球隊耐戰力不足。