德國整體戰煞食 無鋒陣剝牙

猪拉多纳

今晚重頭戲，當然係G組兩隊出線大熱德國同葡萄牙對撼啦！雖然葡萄牙王牌C朗，係當今最佳球星，具備一人扭轉戰局嘅能力，佢喺皇馬就話有一班星級隊友幫手，但喺國家隊就……唉。今場面對以擅長整體戰見稱，盛傳將排出「無鋒陣」嘅德國，C朗有三頭六臂都未必掂，德國讓平半咁抵，好難唔捧場喎！

（無綫翡翠台、明珠台及TVB13、now818台、 中央5台周二凌晨0:00直播）

C朗有幾好波，如果我仲喺度寫幾百字介紹，恐怕大家都會詐型話我呃稿費啦！佢喺今季成功帶領皇馬登頂，成為「雙冠王」，完全壓倒宿敵美斯同巴塞隆拿。但我想講，C朗成日畀人批評佢踢球會同國家隊嘅表現差好遠，插佢揀波踢，球會獎金高就搏命，國家隊太公波就揸流攤，咁講法對呢位「萬人迷」好唔公平。
葡萄牙一人球隊靠C朗

大家攞皇馬同葡萄牙嘅球員名單比對吓，應屆歐聯盟主粒粒皆星，特別係中前場，中場有莫迪歷、迪馬利亞同沙比阿朗素作支援，前線拍檔就係賓施馬同加里夫巴利，咁嘅人腳自然令本身能力已經好高嘅佢，發揮更高水平。但返到國家隊，講笑咁講，C朗見到自己班國家隊隊友都唔開胃啦，單天保至尊係好型，但我相信C朗踢國家隊會辛苦好多，對住班茄喱啡可能都過到骨，一旦撞正有料嘅對手就大劑啦！

好似今晚首度喺巴西亮相就對住今屆爭標分子德國，葡萄牙領隊保羅賓圖想繼續靠C朗一個打救過關？難啲囉！德國連續喺三項大賽都打入前列，雖然同冠軍獎盃無緣，但演出不斷進步。
日耳曼兵團紀律技術兼備

一班球星好似舒恩史迪加、高路斯、湯馬士梅拿同拿姆咁，喺領隊勒夫率領下，盡顯日耳曼民族高度服從嘅特性，令德國嘅實力愈來愈高，今屆佢哋被視為「個人能力結合整體戰術」之師，有望重奪失落多時嘅大力神盃。

何況《圖片報》尋晚仲爆料，話勒夫決定抄哥迪奧拿個無鋒陣，齊行用整體戰打瓜「C朗一人球隊」。今晚第一擊，我信德國可以贏波，推介讓平半嘅上盤。
Data King：分組賽表現醒

‧德國曾17次打入世盃決賽周，奪得3次冠軍，連今屆已連續8次打入決賽周。

‧踢過99場決賽周賽事，錄得60勝19和20負，總共攻入206球，失117球。

‧近2屆決賽周6場分組賽，取得5勝1負。

‧今屆世盃外圍賽歐洲區C組攻入36球，只失10球，成小組之冠，9勝1和未輸過。
Data King：5戰決賽周最叻季軍

‧葡萄牙曾5次打入世盃決賽周，最佳成績為66年奪得季軍。

‧踢過23場決賽周賽事，取得12勝3和8負，總共攻入39球，失22球。

‧近2屆決賽周6場分組賽，錄得3勝2和1負。

‧今屆世盃外圍賽歐洲區F組攻入20球，與同組俄羅斯成小組入球之冠。
乜都玩錦囊：德國睇住食吼半和

德國火力雖強橫，但對住葡萄牙都未必敢狂攻，尤其是上半場雙方都係摸索階段，可能會搓多幾腳睇定啲先。對手葡萄牙靠晒C朗一個，就算佢幾勁都好，整體攻擊力亦只係屬一般，半場和有2.05倍，絕對玩得過。
G組重頭戲

德國Vs葡萄牙

周二凌晨0:00

翡翠台、明珠台、TVB13及now818直播

薩爾瓦多新起源球場