非洲1哥尼日利亞射爆伊朗

猪拉多纳

艾力士：佢哋至少入16強！

世盃分組賽嚟到第5日，今晚有伊朗登場撼尼日利亞，論實力、論星味，伊朗都差尼日利亞一大截，小妹賽前都有向傑志嘅艾力士攞料，佢都話今屆「超霸鷹」有力殺入16強，既然尼日利亞只係小讓平半，上盤仲有1.88倍添，梗係要力撐啦！

（無綫翡翠台、明珠台、TVB13及now818台、中央5台周二凌晨3:00直播）
伊朗4入決賽周只係贏過美國

伊朗對尼日利亞呢場波，戲碼唔算太吸引，可能好多香港球迷連「踩」幾晚睇波之後，都寧願瞓覺回氣好過，不過對於阿拉伯地區嘅粉絲嚟講，伊朗今次闖入世盃決賽周，可以話係無上光榮，有100名嚟自伊朗、阿拉伯同敍利亞嘅球迷就拉隊飛去巴西，前日仲特登去到酒店門口舉晒國旗、拉晒橫額唱歌迎接國家隊，當中以富咸球星迪查加最受歡迎！

不過伊朗陣中最具名氣嘅，就只係得呢位中場球星，雖然佢已經27歲，但國際賽上陣次數只得14次，經驗唔算豐富，好打有限，而且伊朗4次打入決賽周，只係贏過美國1場咁大把，今晚對住尼日利亞，實在難有勝算。
艾力士預言艾文歷基放光芒

反觀尼日利亞狀態雖然唔多好，不過各位尋日睇完日本鬥科特迪瓦一仗，就知身體質素嘅差距係幾咁重要。尼日利亞球員唔止身形贏晒伊朗，論名氣同實力亦都高幾班，小妹賽前做足功課，仲訪問埋傑志翼鋒艾力士添！呢位尼日利亞球員都話，貴為2013非洲冠軍嘅「超霸鷹」，實力強勁，同組只得阿根廷係佢哋對手，所以艾力士都好有信心，預計尼日利亞至少殺到入16強，若然好運的話，去到8強、甚至4強都唔出奇。

講到尼日利亞人腳，艾力士就睇好約翰米基爾，同埋費倫巴治射手艾曼紐艾文歷基喺巴西發光發熱，計小妹話，除咗艾力士推薦嘅雙星，紅軍翼鋒域陀摩西斯、史篤城前鋒奧丹維治，亦係「超霸鷹」嘅關鍵人物，只要呢幾位球星有正常發揮，要砌低伊朗易如反掌啦！
Data King：伊朗防守冠亞洲

‧伊朗曾3次打入世盃決賽周，3次都係小組賽畢業。

‧踢過9場決賽周賽事，僅錄1勝2和6負，總共攻入6球，失18球。

‧近2屆世盃決賽周6場分組賽，錄得1勝1和4負。

‧今屆世盃外圍賽亞洲區A組只失2球，係小組防守王。
Data King：尼日利亞橫行非洲

‧尼日利亞曾4次打入決賽周，最佳成績為16強。

‧踢過14場決賽周賽事，錄得4勝2和8負，總共攻入17球，失21球。

‧近2屆世盃決賽周6場分組賽，錄得2和4負成績。

‧今屆世盃外圍賽非洲區F組保持不敗，攻入7球，係小組入球之冠。
乜都玩錦囊：食住世盃士哥潮捧大

尋日凌晨英格蘭對意大利一仗，因為天氣太熱搞到班球星叫苦連天，不過相信今仗唔會有咁嘅問題，皆因庫里蒂巴氣溫對亞洲同非洲球員嚟講非常清涼，尼日利亞既有一班出色嘅攻擊手，伊朗亦擅長死球戰術，不妨捧埋2.55倍入球大。