阿爾及利亞半場頂得住

猪拉多纳

沙漠之狐唔赦慢熱紅魔

最冇人留意嘅H組拉開戰幔，歐洲「紅魔」比利時於貝洛奧里藏特米內羅球場對非洲「沙漠之狐」阿爾及利亞。比利時近年成績爆升，球隊擁有大堆「妖人」，喺電腦遊戲能力值爆錶，現實世界佢哋全隊身價亦喺32強中第六，高達33.4億港元，至於阿爾及利亞球員總值只得6.5億排25位，只係比利時5分1，唔少球員都想喺世界盃大舞台表演身價，希望獲豪門睇中，首度上場梗係唔想咁快輸，死守之下比利時未必咁快可以打開紀錄，半場和值捧。（無綫翡翠台及明珠台、TVB13及19、now818及840周三凌晨零時直播）

缺席12年決賽周嘅比利時捲土重來，呢個「黃金一代」擁有大量天才球員，被譽為史上最強比利時國家隊，正選球員大部分喺豪門効力，隊長高柏尼助曼城贏得英超冠軍、門將泰拔高爾圖斯係馬德里體育會奪標功臣、中場夏薩特喺車路士踢到曉飛，其餘仲有阿仙奴嘅華美倫、曼聯嘅費蘭尼、愛華頓嘅盧卡古，個個都獨當一面。

比利時前中後三線實力平均，於歐洲區外圍賽以超班姿態早早取得出線資格，更因為世界盃決賽周抽籤前取得大量好成績，世界排名曾上到第六，得以躋身八支種子隊之一，如果以身價計算，佢哋總值33.4億港元，排喺巴西、西班牙、阿根廷、德國及法國之後進入六強。
阿爾及利亞「法國二隊」為前途搏命

至於身價只及比利時五分之一嘅阿爾及利亞，可以話係「法國二隊」，唔少球員都喺法國出世，但又未去到施丹或者賓施馬嘅級數獲法國垂青，佢哋仍可喺歐洲聯賽立足，但個人質素或者表現未能獲豪門青睞。不過，正正係呢個誘因，反而令佢哋更想喺世界盃大舞台出位，例如國際米蘭中場施列迪泰達，踢到季中竟被馬沙利投閒置散，另一中場賓達納相信亦只當熱刺係踏腳石，効力華倫西亞嘅菲侯利，亦唔想再被拖糧求走。
比利時要時間warm up

正正係呢種渴求，阿爾及利亞球員肯定會一人走多一步，世界盃首戰「擺大巴」頂住比利時，事實上，比利時攻力亦受損，阿士東維拉前鋒賓迪基重傷未能入選大軍，盧卡古亦於決賽周開始前倒數階段腳踝受傷，効力里爾嘅年輕前鋒奧歷治火候未足，渡邊年唔懷疑以比利時卡士，會贏波全取三分，但如果阿爾及利亞死守，未warm up嘅比軍冇咁快咬得入，主Ｗ太熱，半場和更值捧。
渡邊年推介 半場和