俄羅斯醒過南韓

猪拉多纳

戰術大師卡比路明恰洪明甫

兩支以打整體戰為主嘅俄羅斯及南韓，於H組首戰就對碰，如果以戰術打戰術，相信俄羅斯主帥卡比路，絕對比南韓領隊洪明甫高唔止一班。兩軍均以青春班應戰，經驗相若，領隊功力成勝負分野，而且俄羅斯奪得2018世界盃主辦權，俄軍要為四年後準備及打拚，鬥志毋庸懷疑，俄羅斯W有2倍屬合理投X選擇。（TVB 13及19、now 818及840周三早上6時直播）

兩軍領隊喺世界球壇都有一定地位，洪明甫至今仍然保持南韓國家隊出場紀錄，多達136次，更於2002年韓日世界盃以隊長身份，帶領國家隊取得歷史最好嘅殿軍。洪明甫坐上教練席位成績亦不俗，2012年倫敦奧運摘下銅牌令舉國歡騰，不過其資歷相對卡比路，仍然有好大距離。
爭佳績為下屆主辦造勢

卡比路球員時代先後協助羅馬、祖雲達斯及ＡＣ米蘭贏得冠軍榮譽，執教皇馬及羅馬均奪得聯賽冠軍，更率領母會ＡＣ米蘭喺意甲、意超盃及歐聯封王，雖然執教英格蘭成績唔好加上同管理層意見不合被炒，但無損其「金牌教練」之名，獲俄羅斯召喚，希望憑佢經驗及功力，於今屆世界盃創造佳績，更寄望下屆以東道主身份贏得世界盃。

俄羅斯同南韓今屆均以青春班為骨幹，但出發點完全不同，正如上述所講，俄軍希望培養球員為未來打拚，以老帶嫰；相反南韓因為青黃不接，上一代球星如朴智星已退役，門將位置仍然靠上屆南非世界盃錯漏百出嘅鄭成龍，其他位置用冇乜大賽經驗嘅球員，兩軍輸贏，真係好靠領隊功力。
洪明甫擾敵玩謝自己

有一件軼事可反映洪明甫功力未夠，原來喺之前嘅熱身賽，佢諗住擾敵，專登叫球員亂着唔同冧巴上陣，諗住其他列強認唔到人，做唔到功課，點知此舉搞到連南韓嘅工作人員都亂晒，做唔番呢幾場熱身賽嘅球員紀錄，將部署完全打亂。

渡邊年相信卡比路帶領俄羅斯可於首仗擊敗南韓，為佢哋下屆鋪路，主W必捧，不過今屆世界盃好興落後球隊反勝，所以想扒冷，玩少少半全場「客主」，34倍值博。
渡邊年推介俄羅斯勝