一切從靚仔球星開始

猪拉多纳

科娜身邊鍾意睇波嘅女性朋友五隻手指數得晒，同一啲唔睇波嘅friend講開「尋晚凌晨3點起身睇波」，佢哋往往露出不屑表情，覺得睇一場廿幾個人追住個波跑嚟跑去嘅比賽勁無謂，更認為夜媽媽起身會好傷皮膚，聽到呢啲說話後我只有無言，因為足球嘅魅力好難用三言兩語就同佢哋講清楚。
尼馬「入屋」開始多人識

四年一度嘅世盃盛事，連我班一向唔睇波嘅女仔friend都睇埋一份，可見世盃威力有幾大，當然，佢哋睇世盃大多數係純粹為咗陪男友、睇靚仔、感受一下熱潮，而佢哋識得嘅球星亦都只限於C朗、美斯同碧咸，不過最令我意想不到嘅係佢哋當中竟然有人識尼馬：「巴西10號仔，今年佢好出名。」可想而知尼馬真係開始「入屋」，成為「人氣王」﹗

其實想當初，科娜亦都係因為一個靚仔而開始睇波，不過我漸漸由一個剩係會睇靚仔球星嘅普通人，變成一個開始感受到足球魔力嘅女球迷，足球絕對唔係單純一項廿幾個人追住個波跑嚟跑去嘅運動，足球係一項充滿血性同激情、充滿驚喜同奇迹嘅運動，鍾意咗睇波後你只會越踩越深，為心愛嘅球隊付出一切，正如女人為咗心愛嘅男人付出所有一樣。

各位姊妹們，希望你哋能夠透過世盃認識足球嘅魅力所在，認真去了解足球呢項運動。