巴西行大運打殘墨西哥

猪拉多纳

足球比賽除咗講求實力，仲要睇運仔o架！如果遇着個發雞盲球證拔「雞」相助，咁就唔使好波、贏運都夠啦！例如巴西揭幕戰贏克羅地亞，咪全靠球證誤判12碼囉；相反，如果你係運滯嘅，贏波就要靠自己努力喇！好似墨西哥首戰咁，入兩球都畀球證判咗詐胡，最後要靠球員努力先險勝，今晚「好運」鬥「努力」，小妹就睇好1.65倍入球大喇！

（無綫翡翠台、明珠台、TVB13及now818台、中央5台周三凌晨3:00直播）
侯克拉傷 班納特頂上

由揭幕戰開始，開入球大嘅次數多好多，對球迷嚟講梗係好事，起碼晚晚捱眼瞓睇波都值得先啦！今晚巴西又登場，大家可以放心喇，先唔理佢哋係唔係得到球證「關照」，班波本身嘅攻擊力都係十分強勁，「森巴軍」近10場波包括熱身賽，總共入咗33球，平均每場入3.3球，堅勁揪！雖然賽前傳出侯克練波嗰陣拉傷左腳肌肉，只係練咗15分鐘就要退操接受治療，今戰未必落場，好在頂上嘅班納特安尼斯奧，上仗都亮過相，快得嚟又有腳法，未必差得過侯克o架。
墨西哥黑仔靠努力搭夠

除咗佢哋3個，中場後上王奧斯卡杜斯山度士都有料到，佢上仗就以一己之力爆入禁區入咗球靚波，今場對住同樣來自美洲嘅墨西哥，只要是但一方贏波，就肯定提早晉級，兩軍鬥攻，入波點會少先？

講真，小妹早幾日見到查維亞靴南迪斯有得後備落場，但又無厘神氣，堅係心淡，唔想撐墨西哥，但好在佢嘅隊友杜斯山度士走上走落，上仗就算畀球證玩，入咗波都吹番轉頭話越位，都可以沉住氣喺下半場清脆贏波，呢股精神如果可以喺今晚展現出嚟，就算輸波都要巴西付出一定代價。我估墨西哥會有波入，但未必頂得住巴西，博入球大啱數。
Data King：巴西喺決賽周入210球

‧巴西曾19次打入世盃決賽周，5次奪得冠軍。

‧踢過97場決賽周賽事，錄得67勝15和15負，總共攻入210球，失88球。

‧連續10場贏波，其中7場零封對手。

‧連續7屆世盃賽

事至少殺入16強。
Data King：墨西哥成日食紅牌

‧墨西哥連續5屆世盃決賽周打入16強。

‧踢過49場決賽周賽事，錄12勝13和24負，總共攻入52球，失89球。

‧近2屆世盃決賽周6場分組賽，錄得2勝2和2負成績。

‧喺世盃決賽周賽事中，6次有球員被趕出場。
乜都玩錦囊：信往績撐讓客

巴西牌面上睇贏晒墨西哥，不過後者對親巴西都特別醒神，過去6次對賽同「森巴兵團」各有勝負，完全唔輸蝕。呢場墨西哥受讓一球，「讓客」有3.55倍，不妨扒冷，博吓佢哋保持不敗啦！