南韓玩謝 俄羅斯方塊

猪拉多纳

世盃第一擊例牌發威

俄羅斯同南韓聽朝上演最後一場世盃首輪分組賽，齋計牌面無疑係俄羅斯秤高些少，賽前俄媒仲猛踩南韓呢樣唔掂、嗰樣唔得添！不過「太極虎」出名鬥心旺盛兼耐力好，況且佢哋喺近屆世盃登場戰例牌發威，亨格比利睇好南韓玩得掂呢副「俄羅斯方塊」，受讓平半捧下盤。

（TVB13、now818台及中央5台周三早上6:00直播）

比利時係H組首名出線大熱，普遍認為俄羅斯同南韓將為次席資格爭崩頭。俄羅斯媒體前日分析過南韓，雖然大讚「太極虎」耐力、鬥心一流，又話巴西天氣幫到佢哋，仲用咗好大篇幅介紹孫興民，叫俄羅斯戰將提防呢位危險人物，但就喪彈南韓訓練方法落伍、邊線防守力差、門前把推力同創造力差等等。
俄媒喪彈「大極虎」獨讚孫興民

俄媒做晒資料搜集，咁俄羅斯大軍呢？陣中射手簡奴尼哥夫喺上周六向俄媒《Sports Express》話，佢哋根本冇研究過南韓，又話雖然今次大軍得3名正前鋒，但人人都夠料踢攻擊位置，冇擔心過鋒力問題。俄媒同俄羅斯都咁鬼自大，換轉你係南韓國腳，唔係唔發火呀？

冇錯，南韓整體人腳係比俄羅斯削，但呢班波喺近3屆世盃首戰都有Happy Ending，包括上屆2:0砌低希臘、06年2:1贏多哥同02年2:0力克波蘭，連續3屆決賽周都打響頭炮，今鋪絕對唔可以睇小。守將李鎔賽前就指俄羅斯球員身體質素係好，但成班手足都未驚過，事關備戰工夫做得好充足，聽落鬥心非常唔錯喎！
俄軍隊長退隊削火力

隨住日本反輸畀科特迪瓦，韓媒賽前即刻攞「杜奧巴效應」大做文章，建議「太極虎」對俄羅斯應該靠快速反擊搵食，傳中準確亦係爭勝元素。前國腳朴智星上周五喺首爾受訪時坦承，一班師弟壓力好大，但就話如果佢哋克服到心理障礙，要砌低俄羅斯唔係冇機。況且俄羅斯隊長舒洛哥夫因肌腱受傷，決賽周展開前一個禮拜先焗住退隊，唔多唔少影響俄羅斯嘅攻擊力，南韓今鋪應該頂得住唔使輸，受讓梗要支持。
Data King：2屆分組賽6戰4負

‧俄羅斯曾9次打入世盃決賽周，最佳成績為殿軍，今屆為02年後再次打入決賽周。

‧踢過37場決賽周賽事，取得17勝6和14負，總共攻入63球，失44球。

‧近2屆決賽周6場分組賽，取得2勝4負。

‧今屆世盃外圍賽歐洲區F組攻入20球，只失5球，成小組之冠。
Data King：近5戰4敗勁食白果

‧南韓曾8次打入決賽周，最佳成績為殿軍，連埋今屆已連續4屆殺入決賽周。

‧對上3屆世盃決賽周首戰全勝。

‧歷來只曾1次同俄羅斯交手，就係去年11月以1:2反輸畀對手。

‧近5場國際賽有4場落敗，當中4場都冇波入。
乜都玩錦囊：俄羅斯冇火做細界

俄羅斯射手基沙哥夫已經過咗高峰，新星高哥連亦缺乏大賽經驗，加埋中場發電機舒洛哥夫無緣決賽周，對住攻擊力唔太強嘅南韓，相信唔慌多波入，1.62倍細趁熱食。