西班牙矢智攞3分

猪拉多纳

背水大戰和都唔掂

今晚喺里約熱內盧舉行嘅B組次輪大戰，上屆冠軍西班牙將要硬撼智利。上仗西班牙以1比5慘敗畀荷蘭，令出線形勢危殆，呢場絕對係和都唔掂嘅背水之戰，為咗全取3分，領隊迪保斯基今仗會用迪亞高哥斯達夥拍費蘭度托利斯打雙箭頭焗攻，不過智利勢必效法荷蘭縮後打反擊，預計會合演入球騷，大盤乃不二之選。（無綫翡翠台及明珠台、TVB 13及19、now 818及840周四凌晨3時直播）
智利學荷蘭穩守突擊

西班牙重蹈上屆嘅覆轍，於今屆首仗落筆打三更慘遭荷蘭狂數五個一皮，對榮譽滿身嘅「鬥牛士」嚟講，無疑係當頭棒喝，依家佢哋排緊小組包尾，得失球（-4）亦處於下風，今仗對住出線勁敵智利，唔單止要贏，最好仲係大勝一場，若果同分計得失球嗰陣都有啲揸拿。主帥迪保斯基深知不能坐以待斃，勢必主動出擊爭勝爭士哥，有傳佢會用迪亞高哥斯達同費蘭度托利斯踢雙箭頭，另外上仗冇出場嘅馬體會中場佐治高基將會被委以重任，希望為強球隊注入更多活力和提升進攻速度。至於守將碧基嚴重缺態或被棄用，不過即使以查維馬天尼斯客串中堅亦唔好得幾多，尤其焗攻之下更令防線不穩。

作為B組攪局者，智利上仗以3比1擊敗澳洲，乘住西班牙輸波搶到出線先機，領隊森柏奧利並冇自滿，佢話球隊頭30分鐘打出應有嘅節奏，創造咗唔少入波良機，但後來開始跌Watt，擺明係畀說話班球員聽要踢得再好啲。據聞森帥打算效法荷蘭，明知西班牙會搶攻，將352調整為532陣式，希望縮後放多啲長傳打反擊，啱晒速度飛快嘅阿歷斯山齊士(A山)發揮。
先發事件揀迪哥領黃

雖然啱啱傷愈嘅維達爾表現麻麻，好彩仲有A山撐住，呢位巴塞翼鋒上仗一傳一射為球隊奠勝，對住球會隊友佐迪艾巴又熟晒路，隨時喺西班牙防線搵到着數。斯維認為今仗勝負難料，倒不如玩入球大仲好過。

特別項目方面，由於迪亞高哥斯達脾氣火爆，遇上搞事當食生菜嘅智利中堅加利美度挑釁，未必沉得住氣，先發事件「被罰黃牌」有7倍絕對值博。
西班牙中場 布斯基斯

上仗頻頻被荷蘭長傳打穿後防，防中布斯基斯責無旁貸，呢位巴塞大將憑住出色嘅護球及閱讀球賽能力，成為西班牙轉守為攻嘅重要樞紐，佢今仗能否頂住智利兇狠壓迫，理順「狂牛」中場組織將成關鍵。
智利前鋒 阿歷斯山齊士

喺巴塞隆拿効力嘅A山同半隊西班牙係球會隊友，對鬥牛兵團嘅攻防體系瞭如指掌，可以為智利提供好多重要情報。呢位技術型前鋒擅於鑽營，埋門把握力強，智利今仗擺明主守，靠晒佢一個喺前線打突擊。
智利中場 維達爾

呢位全能中場上仗對澳洲復出，雖然好番冇耐明顯就住嚟踢，不過經過呢場熱身後應會逐漸上力，維達爾不惜體力滿場飛嘅特點係實踐瘋搶壓迫打法嘅核心人物，其神不知鬼不覺嘅後上入楔亦係一大殺着。
法達斯維推介 入球大