克羅地亞喪轟喀麥隆

猪拉多纳

坦克鋒霸文迪蘇傑復出

世界盃A組賽事，克羅地亞坦克型「鋒霸」文迪蘇傑強勢復出，爆散喀麥隆！克羅地亞揭幕戰踢出激情，雖敗不辱，今仗有射手文迪蘇傑坐完波監猛虎出柙，勢必全力撲擊對手，為外圍賽鹵莽領紅贖罪。反觀喀麥隆本身演出已不濟，今場仲有「靈魂射手」伊度奧因傷倦勤，「非洲雄獅」變成「冇牙病貓」，恐怕只能任由對手宰割。克羅地亞客Ｗ1.58倍屬於穩陣之選，甚至可以直取2.9倍讓球客勝。

（TVB13及19、now 818及840周四早上6時直播）

克羅地亞上仗鬥東道主巴西，反客為主先開紀錄，即使被追平亦不落下風，可惜「不敵」球證，畀對手費特「插水」博到12碼，咁輸法實在非常唔抵。球員內心自然唔服氣，加上全失3分後已無退路，今仗肯定更搏命爭勝。好消息係文迪蘇傑停完賽，可以上陣搏殺，呢位効力拜仁慕尼黑嘅28歲衝刺型前鋒喺外圍賽附加賽次回合為球隊攻入重要一球，但亦因向對手作出粗野攔截而被逐，搞到首場分組賽坐波監。
冇伊度奧難作惡

就係因為文迪蘇傑嘅鹵莽，令克軍上仗鋒線力量打折扣，傳中波往往冇人接應，球隊輸波佢都有間接責任，今仗係時候將功贖罪。另外，早前受傷嘅中場大腦莫迪歷已無大礙，有佢同文迪蘇傑拍住上，足以撕開喀麥隆防線。

喀麥隆首仗輸畀墨西哥欠缺反擊之力，最有威脅係伊度奧一次起腳擦柱而出，其餘時間捱打居多。好不幸伊度奧膝部受傷，佢都承認今仗無法披甲，意味喀麥隆唔止冇咗一位首席射手，亦失去一位精神領袖，隨時方寸大亂而潰敗。因此，預料克羅地亞好大機會先開紀錄，可順勢博埋文迪蘇傑「首名入球」。
克羅地亞前鋒 奧歷

呢位34歲禾夫斯堡前鋒喺揭幕戰左路快放傳中，搞到巴西守將馬些路擺烏龍，證明自己老而彌堅，佢可能喺世盃後退出國家隊，必定搏埋條老命，助球隊出線。
喀麥隆前鋒 阿布巴卡

伊度奧養傷，新星阿布巴卡趁機上位，呢位効力羅連安特嘅22歲射手喺上季法甲取得16球，一鳴驚人，車路士有興趣收購佢，今屆世盃正係顯示身價好時機。
Mic少推介：克羅地亞 勝